Суд у Варшаве прыгаварыў забойцу беларускі Лізаветы Герцэн да пажыццёвага зняволення

17 студзеня, Позірк. Акруговы суд Варшавы 17 студзеня прыгаварыў Дарыяна Слаўчыка — забойцу беларускі Лізаветы Герцэн — да пажыццёвага зняволення, паведамляе тэлеканал “Белсат”.

Пра тое, што пракурор запатрабаваў прыгаварыць маладога чалавека да пажыццёвага зняволення, стала вядома 13 студзеня. Таксама абвінавачанне патрабавала абавязаць яго выплаціць кампенсацыю — па 200 тыс. злотых (каля 48 тыс. долараў) прызнаным пацярпелымі па справе хлопцу загінулай і яе сям’і, якая пражывае ў Беларусі.

7 жніўня 2024 года прэс-сакратар Акруговай пракуратуры Пётр-Антоні Скіба паведаміў, што “атрымана экспертнае заключэнне ад псіхіятраў, псіхолага і сексолага, у якім утрымліваецца выснова пра тое, што падазраваны з’яўляецца разумным і можа браць удзел у цяперашнім дасудовым разглядзе, а таксама ў судовых паседжаннях”.

Пра тое, што пракуратура перакваліфікавала абвінавачанне 23-гадоваму Слаўчыку, які напаў летась 25 лютага ў цэнтры Варшавы на беларуску, якая пасля памерла, стала вядома 11 красавіка.

Першапачаткова ён быў абвінавачаны ў замаху на забойства, спалучаным з згвалтаваннем і рабаваннем, затым — у забойстве на сексуальнай глебе і разбоі.

Паводле распаўсюджанай тады ў польскіх СМІ інфармацыі, раней у пракуратуры не было доказаў таго, што напад стаў непасрэднай прычынай смерці беларускі, але затым сабраная доказная база (у тым ліку вынікі ўскрыцця) дазволіла абвінаваціць маладога чалавека ў забойстве.

Паводле версіі следства, раніцай 25 лютага 2024 года малады чалавек, пагражаючы Герцэн нажом, адцягнуў яе да брамы шматкватэрнага дома ў цэнтры польскай сталіцы, дзе згвалтаваў, душыў і жорстка збіў. Пасля гэтага ён пакінуў 25-гадовую ахвяру ў непрытомным стане, адправіўся ў краму, а затым на трамваі вярнуўся ў здымную кватэру, дзе жыў з дзяўчынай.

Слаўчыка арыштавалі ў той самы дзень на выхадзе з дому. Пры выбшуке ў кватэры былі знойдзеныя вялікі кухонны нож і балаклава, якія, як выказала здагадку следства, былі пры ім падчас здзяйснення злачынства.

1 сакавіка Герцэн памерла ў бальніцы. Яе пахавалі 14 сакавіка на Паўночных камунальных могілках Варшавы.

Трагедыя выклікала вялікі грамадскі рэзананс як у Беларусі, так і ў Польшчы. Некалькі тысяч чалавек 6 сакавіка ўзялі ўдзел у вулічнай акцыі памяці загінулай у Варшаве.