Беларускія праваабаронцы прызналі палітвязнямі яшчэ 15 чалавек

21 студзеня, Позірк. Палітычнымі зняволенымі прызналі яшчэ 15 чалавек, сведчыць заява, якую 21 студзеня падпісалі праваабарончыя арганізацыі — цэнтр “Вясна”, “Прававая ініцыятыва” і Lawtrend.

Адпаведны статус атрымалі асуджаныя Вікторыя Верас, Максім Чахоўскі, Генадзь Саўрыцкі, Аляксандр Рандарэнка, Аляксандр Мірскі, а таксама змешчаныя пад варту асобы — Вікторыя Гусарава, Вітольд Шалкевіч, Мікалай Юшчанка, Павел Вабішчэвіч, Аляксандр Зіненка, Дзмітрый Удовін, Андрэй Дарошка, Вячаслаў Ільіч, Ігар Кісляк і Віталь Папроцкі.

Верас асуджаная паводле артыкулаў 130, 342 і 361 Крымінальнага кодэкса, Чахоўскі і Саўрыцкі — паводле арт. 130, Рандарэнка — паводле арт. 130 і 130¹, Мірскі — паводле арт. 356 КК.

Гусаравай выстаўленыя абвінавачанні паводле арт. 130; Шалкевічу — паводле арт. 391, 130, 342, 369, 368 і 370; Юшчанку — паводле арт. 368 і 356; Вабішчэвічу і Зіненку — паводле арт. 289, 365 і 309; Удовіну, Дарошку, Ільічу, Кісляку і Папроцкаму — паводле арт. 130 і 361 КК.

Праваабаронцы лічаць, што далейшае пазбаўленне волі ўсіх гэтых асобаў з’яўляецца палітычна матываваным.

Яны патрабуюць ад уладаў Беларусі перагледзець вынесеныя выракі і абраныя меры стрымання “пры выкананні права на справядлівае разбіральніцтва і ліквідацыі фактараў, якія паўплывалі на кваліфікацыю дзеянняў, выгляд і памер пакарання”; вызваліць пералічаных палітвязняў, “прымяніўшы іншыя меры для забеспячэння іх яўкі ў суд”; неадкладна вызваліць усіх палітвязняў, перагледзець палітычна матываваныя выракі і спыніць рэпрэсіі супраць грамадзян краіны.

На 21 студзеня беларуская праваабарончая супольнасць прызнае палітвязнямі 1.256 чалавек. Насамрэч людзей, якія зазналі рэпрэсіі ў той ці іншай форме, значна больш.

Даведка “Позірку”:

• арт. 130 — распальванне расавай, нацыянальнай, рэлігійнай або іншай сацыяльнай варожасці або варажнечы;
• арт. 130¹ — рэабілітацыя нацызму;
• арт. 289 — акт тэрарызму;
• арт. 309 — наўмыснае прывядзенне ў непрыдатнасць транспартнага сродку або шляхоў зносін;
• арт. 342 — арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх;
• арт. 356 — здрада дзяржаве;
• арт. 361 — заклікі да мер абмежавальнага характару (санкцый), іншых дзеянняў, скіраваных на прычыненне шкоды нацыянальнай бяспецы Рэспублікі Беларусь;
• арт. 365 — умяшанне ў дзейнасць супрацоўніка органаў унутраных спраў;
• арт. 368 — абраза прэзідэнта;
• арт. 369 — абраза прадстаўніка ўлады;
• арт. 370 — знявага дзяржаўных сімвалаў;
• арт. 391 — абраза суддзі або народнага засядацеля.