Сайт BelPol зведаў хакерскі напад
26 студзеня, Позірк. Сайт аб’яднання былых супрацоўнікаў сілавых структур BelPol, якія перайшлі ў апазіцыю рэжыму, у дзень выбараў 26 студзеня зведаў хакерскі напад.
Спачатку сайт не быў даступны цалкам (памылка 403: доступ забаронены), цяпер там размешчана паведамленне аб тэхнічных работах.
“Апошнія два тыдні на наш сайт у рэжыме нон-стоп праводзіліся атакі. Адна з іх мела поспех. Аўтаматычна сайт быў адключаны, і цяпер ідзе праца па аднаўленні яго працы“, — паведамілі “Позірку“ ў BelPol.
22 студзеня BelPol апублікаваў інфармацыю аб атрыманні спісаў звыш 10 тыс. членаў выбарчых камісій і назіральнікаў на “выбарах прэзідэнта“. Адзначалася, што “ўсе яны былі прызначаныя рэжымам яшчэ ў верасні 2024 года (г. зн. нават да абвяшчэння даты прэзідэнцкіх выбараў) па выніках праверак у “КДБ-МУС“ на лаяльнасць да дыктатара”.
BelPol абвясціў аб запуску на сайце пошукавіка, куды ўнесеныя звесткі 4.828 членаў камісій і 3.935 назіральнікаў.
23 студзеня Генеральная пракуратура паведаміла аб узбуджэнні крымінальнай справы па ч.1 арт. 2031 Крымінальнага кодэкса (наўмысныя незаконныя збор, прадастаўленне інфармацыі аб прыватным жыцці і (або) персанальных даных іншай асобы без яе згоды, якія пацягнулі прычыненне істотнай шкоды правам, свабодам і законным інтарэсам грамадзяніна).
Улады засакрэцілі членаў выбарчых камісій нібыта ў інтарэсах іх бяспекі. На прэзідэнцкіх выбарах-2020 фіксаваліся выпадкі, калі камісіі пад аховай сілавікоў пакідалі выбарчыя ўчасткі, каля якіх знаходзіліся грамадзяне, якія патрабавалі рэальнага падліку галасоў.
На некаторых участках падлік вёўся сумленна: выніковыя пратаколы сведчылі пра перавагу Святланы Ціханоўскай. Цяпер, як заявіў BelPol, каб пазбегнуць уцечкі інфармацыі ўсе сябры камісій і назіральнікі праходзяць праверку на лаяльнасць уладзе ў КДБ і МУС.