Гендакладчык ПАСЕ па Беларусі: Так званыя выбары — прыклад антыдэмакратычнага праўлення Лукашэнкі

27 студзеня, Позірк. “Ніякага даверу. Ніякай легітымнасці”, — такім чынам генеральны дакладчык Парламенцкай асамблеі Савета Еўропы (ПАСЕ) па пытанні аб дэмакратычнай Беларусі Рышард Петру ацаніў 26 студзеня мерапрыемства, што адбылося ў той дзень, якое афіцыйны Мінск лічыць “прэзідэнцкімі выбарамі”.

“Так званыя прэзідэнцкія выбары ў Беларусі сёння служаць прыкладам рэпрэсіўнага, антыдэмакратычнага праўлення Лукашэнкі на працягу апошніх трох дзесяцігоддзяў. <…> Мы выступаем разам з народам Беларусі за дэмакратычную будучыню, заснаваную на павазе правоў чалавека і вяршэнстве закона”, — напісаў ён на сваёй старонцы ў сацыяльнай сетцы Х.

Па выніках гэтага мерапрыемства Цэнтрвыбаркам абвясціў пераможцам Аляксандра Лукашэнку, які, як сцвярджаецца, атрымаў 86,82% галасоў.

Незадоўга да асноўнага дня галасавання, 22 студзеня, Петру заяўляў, што “беларускі народ пазбаўляюць права ўдзельнічаць у свабодных і справядлівых выбарах”. Ён нагадаў пра рэпрэсіі з боку рэжыму Лукашэнкі, якія прывялі да з’яўлення палітвязняў і масавай эміграцыі.

6 студзеня кіраўніца Аб’яднанага пераходнага кабінета Святлана Ціханоўская абмеркавала з дакладчыкамі ПАСЕ падрыхтоўку новай рэзалюцыі па Беларусі і ўдзел дэлегацыі беларускіх дэмсіл у рамках яе зімовай сесіі 27–31 студзеня ў Страсбургу.

Год таму ПАСЕ прыняла рашэнне аб увядзенні інстытута генеральнага дакладчыка па Беларусі і ўдзеле дэлегацыі дэмакратычных сіл краіны ў сесіях ПАСЕ. У будынку ПАСЕ афіцыйна адкрыўся офіс беларускіх дэмсіл.

У чэрвені 2023 года ПАСЕ прыняла адмысловы даклад аб становішчы беларусаў за мяжой з рэкамендацыямі для парламентаў і ўрадаў аб падтрымцы іх легалізацыі і мабільнасці. У развіццё даклада праз год была арганізаваная адмысловая практычная канферэнцыя “Люксембургскія рашэнні”, на якой былі выпрацаваныя канкрэтныя прапановы па імплементацыі рэкамендацый.