Лукашэнка вядзе Беларусь да страты незалежнасці — Латушка

26 студзеня, Позірк. Электаральная кампанія, якая праходзіць у Беларусі, — гэта “не выбары, а чарговая спецаперацыя” па падаўжэнні паўнамоцтваў Аляксандра Лукашэнкі, заявіў намеснік старшыні Аб’яднанага пераходнага кабінета (АПК), кіраўнік Народнага антыкрызіснага ўпраўлення Павел Латушка, выступаючы 26 студзеня ў Варшаве на масавай акцыі беларускай даяспары.

Паводле слоў палітыка, Лукашэнка “павінен адказаць перад беларускім народам за здзейсненыя ім злачынствы”.

“Мы маем дзве мэты. Палітычная — каб Лукашэнка больш ніколі не атрымаў суб’ектнасць прэзідэнта краіны і не меў міжнароднага юрыдычнага права прадстаўляць Беларусь за мяжой. І прававая — прыцягненне Лукашэнкі да адказнасці за тыя злачынствы, якія ён здзейсніў над беларускім народам”, — заявіў намеснік кіраўніцы АПК.

Пры гэтым, паводле яго слоў, “з Лукашэнкам немагчыма дамаўляцца, паколькі незалежная краіна не можа існаваць без свабоднага народа”. “Пакуль Лукашэнка ва ўладзе, беларусы не будуць свабоднымі. Лукашэнка з’яўляецца не гарантам незалежнасці, а тым чалавекам, які вядзе да таго, каб Беларусь страціла свой суверэнітэт і незалежнасць”, — сказаў Латушка.

Цяперашняя кампанія праходзіць пад поўным кантролем уладаў. Палітычнае поле краіны цалкам зачышчанае ад актыўных апанентаў Аляксандра Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, праваабаронцы кажуць пра імітацыю канкурэнцыі. З крытыкай выбараў выступілі Еўрапарламент, ЗША, шэраг іншых дэмакратычных дзяржаў ды інш.

Апрача Лукашэнкі кандыдатамі на пасаду прэзідэнта зарэгістраваныя лідары трох праўладных партый — Алег Гайдукевіч (Ліберальна-дэмакратычная партыя Беларусі), Сяргей Сыранкоў (Камуністычная партыя Беларусі) і Аляксандр Хіжняк (Рэспубліканская партыя працы і справядлівасці). Яшчэ адзін кандыдат — былы член Аб’яднанай грамадзянскай партыі, дэпутат Палаты прадстаўнікоў у 2016–2019 гадах, удзельніца выбарчай кампаніі 2020 года Ганна Канапацкая, якая пазіцыянуе сябе як “дэмакратычную альтэрнатыву”, аднак крытыкуе не Лукашэнку, а яго апанентаў, што знаходзяцца ў турме або за мяжой.

З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.