Кіраўнік літоўскай дыпламатыі заклікаў краіны ЕС падтрымаць іск Вільнюса ў МКС супраць рэжыму Лукашэнкі
Кіраўнік МЗС Літвы Кястуціс Будрыс
27 студзеня, Позірк. 26 студзеня ў Беларусі “ў чарговы раз прайшло арганізаванае мерапрыемства па перапрызначэнні” Аляксандра Лукашэнкі, якое нельга назваць “ні выбарамі, ані нечым іншым, што нагадвала б пра дэмакратычныя працэдуры і інстытуты”, заявіў журналістам кіраўнік МЗС Літвы Кястуціс Будрыс 27 студзеня ў Бруселі перад пасяджэннем кіраўнікоў знешнепалітычных ведамстваў краін Еўрасаюза.
“Сёння мы мусім пацвердзіць нашу палітыку ў дачыненні да Беларусі, якая заключаецца ва ўчыненні ціску на рэжым праз сталыя парушэнні правоў чалавека, праз абмежаванне правоў палітычнай апазіцыі, а таксама варожасці ў дачыненні да журналістаў і палітычнай апазіцыі”, — сказаў ён.
Паводле слоў Будрыса, у XXI стагоддзі ў Еўропе адбываецца тое, што “больш за 1.200 чалавек дагэтуль застаюцца палітычнымі вязнямі”.
“Таму мы павінны працягваць падтрымліваць дэмакратычную Беларусь, падтрымліваць кіраўніцтва дэмакратычнай Беларусі і працягваць ціснуць на рэжым, які таксама з’яўляецца ваенным тылам Расіі”, — падкрэсліў кіраўнік літоўскай дыпламатыі.
Чыноўнік заклікаў не забываць, што “Беларусь адыграла сваю ролю ў незаконнай агрэсіі Расіі супраць Украіны, і за гэта Беларусь і яе кіраўніцтва таксама павінны несці адказнасць”.
“Мы заклікаем нашых еўрапейскіх сяброў, краіны — члены ЕС падтрымаць перадачу Літвой спраў аб злачынствах супраць чалавечнасці ў Міжнародны крымінальны суд, гэта правільнае рашэнне”, — заявіў ён, відавочна, маючы на ўвазе перададзеныя 30 верасня 2024 года літоўскім урадам матэрыялы пра “трансгранічныя злачынствы супраць чалавечнасці, здзейсненыя Лукашэнкам і яго памагатымі ў дачыненні да беларусаў”.
Увечары 26 студзеня ў Бруселі ад імя вярхоўнай прадстаўніцы Еўрасаюза па замежных справах і палітыцы бяспекі Каі Калас адбылася вячэра, на якой абмяркоўвалася сітуацыя ў Беларусі. У ёй узяла ўдзел беларускі дэмакратычны лідар Святлана Ціханоўская.
Калас і камісар па пытаннях пашырэння ЕС Марта Кос выступілі з сумеснай заявай, у якой адзначылі, што Еўрасаюз не прызнае мерапрыемства, што адбылося ў той жа дзень, якое афіцыйны Мінск лічыць “прэзідэнцкімі выбарамі”.
“Фіктыўныя выбары ў Беларусі”, падкрэслілі яны, “не былі ні свабоднымі, ані справядлівымі”.
“Народ Беларусі заслугоўвае рэальнага права голаса ў пытанні пра тое, хто кіруе яго краінай. Бесперапыннае і беспрэцэдэнтнае прыгнечанне правоў чалавека, абмежаванні на ўдзел у палітычным жыцці і доступ да незалежных СМІ ў Беларусі пазбавілі выбарчы працэс усякай легітымнасці. Мы заклікаем рэжым неадкладна і безумоўна вызваліць усіх палітычных зняволеных, больш за тысячу з якіх адвольна ўтрымліваюцца пад вартай, уключаючы супрацоўніка прадстаўніцтва Еўрапейскага саюза”, — адзначылі Калас і Кос.
Паводле даных Цэнтрвыбаркама Беларусі, Аляксандр Лукашэнка атрымаў 5.136.293 голаса (86,82%), Сяргей Сыранкоў (Камуністычная партыя Беларусі) — 189.740 (3,21%), Алег Гайдукевіч (Ліберальна-дэмакратычная партыя Беларусі) — 119.272 (2,02%), Ганна Канапацкая (былы член Аб’яднанай грамадзянскай партыі, дэпутат Палаты прадстаўнікоў у 2016–2019 гадах, удзельніца выбарчай кампаніі 2020 года) — 109.760 (1,86%), Аляксандр Хіжняк (Рэспубліканская партыя працы і справядлівасць) — 102.729 (1,74%). Супраць усіх прагаласавала 213.277 выбаршчыкаў (3,60%).
Канчатковыя вынікі выбараў-2025 будуць падведзеныя 3 лютага.
23 студзеня намеснік старшыні Аб’яднанага пераходнага кабінета Павел Латушка заявіў, што іншыя краіны пакуль не прынялі рашэння аб далучэнні да іску Літвы супраць Аляксандра Лукашэнкі, атрыманыя адмовы ад “шэрагу ключавых партнёраў”.