У Мінску выпала з акна і загінула паўтарагадовае дзіця

7 лютага, Позірк. Пра гібель паўтарагадовага дзіцяці паведамляе прэс-служба Галоўнага ўпраўлення ўнутраных спраў Мінгарвыканкама.

Да трагедыі прывяло падзенне з 15-га паверха шматкватэрнага дома ў Мінску.

“Хлопчык знаходзіўся дома з маці. Пакуль жанчына на кароткі час выйшла ў суседні пакой, ён улез на крэсла, што стаяла ля акна, апынуўся на падаконніку, адкрыў акно і выпаў, не ўтрымаўшыся”, — гаворыцца ў паведамленні.

Адзначаецца, што дзіця выхоўвалася ў добрай сям’і і было малодшым з двух малалетніх дзяцей.

“Маладыя бацькі не траплялі ў поле зроку інспекцыі па справах непаўналетніх, — паведаміў начальнік інспекцыі па справах непаўналетніх Фрунзенскага РУУС Мінска Андрэй Менц. — Другое дзіця ў момант трагедыі знаходзіўся ў дзіцячым садку, а бацька — на працы”.

Супрацоўнікі хуткай медычнай дапамогі “неадкладна прыбылі” на месца здарэння, але “выратаваць дзіця не ўдалося”, гаворыцца ў паведамленні.

МУС заклікала бацькоў ствараць “бяспечныя ўмовы для дзяцей у доме”, бо “з-за ўзросту” малыя “не заўсёды разумеюць многія небяспекі і, застаўшыся без належнага нагляду, могуць трапіць у бяду”.