BySol абвясціў збор для Паліны Шарэнда-Панасюк

7 лютага, Позірк. Фонд салідарнасці BySol абвясціў збор сродкаў для былой палітзняволенай Паліны Шарэнда-Панасюк.

Сума збору складае 5.000 еўра.

Адзначаецца, што падрабязна прызначэнне сродкаў “складана распісаць”, бо 6 лютага экс-палітзняволеная пабачыла родных упершыню за чатыры гады, і супрацоўнікі фонду не хочуць “падрабязна распытваць пра ўсе яе патрэбы”.

“Таму мы паставілі стандартную суму, якую выстаўляем у падобных выпадках у іншых нашых зборах <…>. Цяпер Паліна прызвычайваецца да свабоды, але наперадзе яшчэ доўгі шлях аднаўлення — і ёй патрэбна наша дапамога. Пасля чатырох гадоў за кратамі важна проста прыйсці ў сябе, аднавіць здароўе і пачаць жыць нанова. Мы адкрываем гэты збор, каб падтрымаць Паліну і яе сям’ю. Ваша дапамога — гэта крок да таго, каб яна магла спакойна адпачыць, паправіць здароўе і вярнуцца да нармальнага жыцця”, — падкрэсліваюць у BySol.

Пра вызваленне Паліны Шарэнда-Панасюк 1 лютага паведаміў яе муж Андрэй Шарэнда.

6 лютага, у выніку эвакуацыі з Беларусі, жанчына прыехала ў Вільнюс.

Шарэнда-Панасюк знаходзілася ў няволі з 3 студзеня 2021 года. Праз шэсць месяцаў пасля затрымання суд Маскоўскага раёна Брэста прыгаварыў яе да 2 гадоў пазбаўлення волі ў калоніі агульнага рэжыму паводле артыкулаў 364 (гвалт у дачыненні да супрацоўніка органаў унутраных спраў), 369 (абраза прадстаўніка ўлады) і 368 (абраза прэзідэнта) Крымінальнага кодэкса.

У красавіку 2022 года, кастрычніку 2023-га і кастрычніку 2024-га палітзняволеную прызналі вінаватай паводле арт. 411 КК (злоснае непадпарадкаванне патрабаванням адміністрацыі выпраўленчай установы, якая выконвае пакаранне ў выглядзе пазбаўлення волі). Дадаткова яна атрымала тры гады і адзін дзень пазбаўлення волі. Яна выйшла на свабоду раней у сувязі з тым, што дзень у СІЗА залічваецца як паўтара.

21 сакавіка 2024 года Камітэт ААН па ліквідацыі дыскрымінацыі ў дачыненні да жанчын заклікаў беларускія ўлады прыняць тэрміновыя меры для абароны Шарэнда-Панасюк. Гэта быў першы такі выпадак па справах супраць Беларусі.

На наступны дзень у эфір выйшла інтэрв’ю палітзняволенай дзяржаўнаму тэлеканалу “Беларусь 1”, у якім яна заявіла, што звярнулася да Лукашэнкі з прашэннем аб памілаванні.

Фонд BySol дзейнічае з 2020 года. Акрамя збору ахвяраванняў для пацярпелых ад рэпрэсій і добраахвотнікаў ва Украіне, ён займаецца эвакуацыяй беларусаў, якія знаходзяцца ў небяспецы, дапамагае палітзняволеным і іх сем’ям, а таксама тым, хто вызваліўся, адаптавацца ў новай краіне. Прызнаны ўладамі Беларусі “экстрэмісцкім фарміраваннем”. Супраць саўзаснавальніка фонду Андрэя Стрыжака і яго паплечніка, кіраўніка фонду By_Help Аляксея Лявончыка, у Беларусі заведзена некалькі крымінальных спраў, вядзецца спецвытворчасць.