У спіс “экстрэмістаў“ дададзены 21 чалавек

28 лютага, Позірк. У спіс “асоб, датычных да экстрэмісцкай дзейнасці”, 28 лютага дададзены яшчэ 21 чалавек. Цяпер у дакуменце, які размяшчаецца на сайце Міністэрства ўнутраных спраў, 4.990 пазіцый.

Усе ўнесеныя ў спіс грамадзяне асуджаныя паводле артыкулаў, якія ўлады выкарыстоўваюць для палітычнага пераследу.

У спіс уключаныя звесткі пра чатырох чалавек, якіх беларускія праваабаронцы прызналі палітвязнямі. Гэта асуджаныя на невядомы тэрмін пазбаўлення волі Анатоль Крупін (арт. 130 Крымінальнага кодэкса), Іосіф Дулеба (арт. 361¹), Юрый Піскуновіч (арт. 342), Ігар Кузаўка (арт. 361 і 361¹).

Таксама ў спіс трапілі адбываючыя пакаранне паводле арт. 342 Владзіслаў Зінкевіч (1 год пазбаўлення волі), асуджаныя на невядомы тэрмін паводле таго ж артыкула Яўген Бацяноўскі, Сяргей Сандалюк, Анжэла Сандалюк, Віктар Лемяшэўскі, Антон Невар, а таксама Пётр Філіповіч (арт. 130 і 368).

Акрамя таго, у спіс уключаныя асуджаныя на невядомыя тэрміны паводле арт. 342 Ірына Ксенафонтава, Алег Судніковіч, Дзяніс Коўшык, Расціслаў Яковіч, Іван Плышэўскі, Таццяна Піляк, Вера Дзянісава, Юрый Войніла, Андрэй Прыходзька і Таццяна Васільева (ч. 1 арт. 361⁴). Насупраць іх прозвішчаў стаіць паметка “судзімасць не пагашаная”, што звычайна азначае вынясенне прысуду без пазбаўлення волі.

Даведка “Позірку”:

арт. 130 Крымінальнага кодэкса — распальванне расавай, нацыянальнай, рэлігійнай або іншай сацыяльнай варожасці ці варажнечы;

арт. 342 — арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх;

арт. 361 — заклікі да дзеянняў, скіраваных на прычыненне шкоды нацыянальнай бяспецы;

арт. 361¹ — стварэнне экстрэмісцкага фарміравання або ўдзел у ім;

арт. 361⁴ — садзейнічанне экстрэмісцкай дзейнасці;

арт. 368 — абраза прэзідэнта.