Палітвязнямі прызнана яшчэ шэсць чалавек

27 лютага, Позірк. Беларуская праваабарончая супольнасць прызнала палітвязнямі яшчэ шэсць чалавек, вынікае з тэксту заявы, распаўсюджанай 27 лютага праваабарончым цэнтрам“Вясна”.

Гэты статус атрымалі асуджаныя Аляксандр Краўчук, Арцём Палякоў, Вадзім Сенчанка і Максім Бельчанка, а таксама зняволеныя пад варту Яўген Бойка і Паліна Піткевіч (журналістка).

Краўчук асуджаны па арт. 361⁴ Крымінальнага кодэкса (садзейнічанне экстрэмісцкай дзейнасці) на 4,5 года, Сенчанка — па арт. 361² (фінансаванне экстрэмісцкай дзейнасці) да 3,5 года, Бельчанка — па арт. 361⁴ і 209 (махлярства) да 3 гадоў пазбаўлення волі. Прысуд Палякову праваабаронцам невядомы, ён абвінавачваўся паводле арт. ³⁶¹¹ (стварэнне экстрэмісцкага фармавання альбо ўдзел у ім) і 361⁴.

Бойка абвінавачваецца паводле арт. 361⁴, Піткевіч — 361¹.

Праваабаронцы патрабуюць неадкладна вызваліць названых і ўсіх палітычных зняволеных і спыніць рэпрэсіі.

Заяву падпісалі праваабарончы цэнтр “Вясна“, Lawtrend, Беларускі ПЭН, “Прававая ініцыятыва”, Беларускі дом правоў чалавека імя Барыса Звозскава, Беларускі Хельсінкскі камітэт і Human Constanta.

У цяперашні час беларуская праваабарончая супольнасць прызнае палітвязнямі 1.233 чалавекі, 39 з іх атрымалі згаданы статус з 25 па 27 лютага.