Генпракуратура накіравала ў суд крымінальную справу топ-менеджара “буйнога прадпрыемства энергасістэмы”
15 красавіка, Позірк. Генеральная пракуратура накіравала ў суд крымінальную справу першага намесніка генеральнага дырэктара “буйнога прадпрыемства энергасістэмы” Беларусі.
Паводле інфармацыі нагляднага органа, фігурант абвінавачваецца паводле ч. 3 арт. 430 КК (атрыманне хабару).
Абвінавачанымі па справе таксама праходзяць кіраўнік прыватнага суб’екта гаспадарання і яго намеснік (ч. 3 арт. 431 — дача хабару ў асабліва буйным памеры або асобай, раней судзімай за <…> атрыманне хабару або пасрэдніцтва ў хабарніцтве, ч. 6 арт. 16 і ч. 3 арт. 431 — дапамога ў дачы хабару).
Згодна з матэрыяламі справы, топ-менеджар прадпрыемства энергасістэмы ў верасні 2025 года атрымаў хабар у суме 134 тыс. рублёў “за забеспячэнне выбару канкрэтнай прыватнай арганізацыі пастаўшчыком тавару — блокавай камплектнай трансфарматарнай падстанцыі ў бетоннай абалонцы коштам каля 1,2 млн рублёў, а таксама заключэнне дагавора на пастаўку такой падстанцыі для аб’екта будоўлі”.
На маёмасць абвінавачаных коштам больш за 2 млн рублёў накладзены арышт.
Сцвярджаецца, што кіраўнікі “цалкам прызналі сваю віну”.
Абвінавачаны ў атрыманні хабару ўзяты пад варту, да асобы, якая абвінавачваецца ў дачы хабару, выкарыстаны заклад, у дапамозе — падпіска пра нявыезд і належныя паводзіны.
3 красавіка паведамлялася, што былы намеснік старшыні Гродзенскага райвыканкама прыгавораны да 7,5 года пазбаўлення волі ва ўмовах узмоцненага рэжыму — за хабар.
Асуджаны таксама атрымаў штраф у памеры 450 базавых велічыняў (20.250 рублёў) і быў на 5 гадоў пазбаўлены права займаць “пасады прадстаўніка ўлады і звязаныя з выкананнем арганізацыйна-распарадчых, адміністрацыйна-гаспадарчых абавязкаў, здзяйсненнем юрыдычна значных дзеянняў”.
Адзначалася, што 41-гадовы мужчына, імя якога не называлася, быў затрыманы ўлетку 2025 года. Паводле матэрыялаў следства, са снежня 2023 года па ліпень 2025-га ён “неаднаразова атрымліваў узнагароды ў выглядзе грошай, а таксама будаўнічых матэрыялаў”: “Такім чынам два прадстаўнікі камерцыйных структур дзякавалі яму за садзейнічанне ў вырашэнні пытанняў, якія ўваходзяць у кампетэнцыю абвінавачанага”.
12 сакавіка на нарадзе пра меры “па выключэнні неабгрунтаванага і нядобрасумленнага пасярэдніцтва” Аляксандр Лукашэнка заявіў, што міністр прыродных рэсурсаў і аховы навакольнага асяроддзя Сяргей Масляк знаходзіцца ў следчым ізалятары паводле абвінавачання ў хабарніцтве.
“Яго ўзялі з доказамі злачынства. Я вас папярэджваў, што мы ж там не хапаем на вуліцы каго заўгодна. Швед (старшыня Вярхоўнага суда, раней генеральны пракурор Андрэй Швед. — “Позірк”.), а цяпер Гара Дзмітрый Юр’евіч (генеральны пракурор, былы старшыня Следчага камітэта. — “Позірк”.) гэта жорстка кантралююць. Калі трэба — паведамяць”, — сказаў тады Лукашэнка.
У 2025 годзе да крымінальнай адказнасці за карупцыйныя злачынствы прыцягнута 750 службовых асоб, паведаміла на прэс-канферэнцыі 24 сакавіка ў Мінску старшы пракурор упраўлення Генеральнай пракуратуры па барацьбе з карупцыяй і арганізаванай злачыннасцю Вольга Бахар.
У 2025 годзе за здзяйсненне злачынстваў карупцыйнай скіраванасці асуджана 657 асоб — на 7,3% менш, чым у 2024-м (709), сведчаць даныя Вярхоўнага суда.
