ЕБРР: Эканоміка Беларусі вырасце ў 2025 годзе на 2,5%

27 лютага, Позірк. Рост эканомікі Беларусі ў 2025 годзе складзе 2,5%, гаворыцца ў лютаўскім прагнозе Еўрапейскага банка рэканструкцыі і развіцця (ЕБРР).

Аналітыкі банка лічаць, што аналагічны паказчык валавога ўнутранага прадукту будзе таксама па выніках 2026 года.

У дакладзе “Рэгіянальныя эканамічныя перспектывы“ ўтрымліваюцца прагнозы і па іншых дзяржавах былога СССР: у Азербайджане рост ВУП сёлета і налета складзе адпаведна 3% і 2,5%, Арменіі — 5% і 4,5%, Грузіі — 6% і 5%, Казахстане — 5,2% і 4,5%, Кыргызстане — 7% і 6%, Латвіі — 2% і 2,5%, Літве — 2,8% і 2,7, Малдове — 2% і 3,8%, Расіі — па 1,5%, Таджыкістане — 7% і 5,7%, Туркменістане — па 6,3%, Узбекістане — па 6%, Украіне — 3,5% і 5%, Эстоніі — 1,7% і 2,6%.

Паводле звестак Нацыянальнага статыстычнага камітэта, эканоміка Беларусі ў студзені вырасла на 3,7% да студзеня 2024-га.

Вайна і звязаныя з гэтым эканамічныя праблемы ў 2025 годзе не знікнуць, “нават калі будуць нармальныя зрухі на фронце“, таму сітуацыя для беларускай эканомікі “будзе няпростая“, заявіў Аляксандр Лукашэнка 26 студзеня на прэс-канферэнцыі пасля галасавання на мерапрыемстве, названым уладамі “прэзідэнцкімі выбарамі“.

Паводле зацверджаных Лукашэнкам найважнейшых эканамічных прагнозных (дэ-факта планавых) параметрах на 2025 год, рост ВУП павінен скласці 4,1%.

5 снежня 2024 года ў сваім макраэканамічным прагнозе спецыялісты Еўразійскага банка развіцця выказалі маркаванне, што ў 2025 годзе рост беларускай эканомікі замарудзіцца да 2,6%.

Міжнародны валютны фонд у леташнім восеньскім аглядзе разлічваў, што ВУП краіны павялічыцца ў 2025-м на 2,3%.

У сярэдзіне кастрычніка мінулага года Сусветны банк выдаў прагноз, згодна з якім беларуская эканоміка ў 2025 годзе вырасце на 1,2%.

У студзені 2024 года рост эканомікі склаў 2,8%, студзені — лютым — 4%, студзені — сакавіку — 4,1%, студзені — красавіку — 5,1%, студзені — траўні — 5,2%, студзені — чэрвені — 5%, студзені — ліпені — 5,5%, студзені — жніўні — 4,9%, студзені — верасні — 4,5%, студзені — кастрычніку — 4,2%, студзені — лістападзе — 3,9%.

Па выніках года ВУП павялічыўся на 4%.