Большасць цяжкіх злачынстваў здзяйсняюць непрацоўныя грамадзяне, сцвярджае кіраўнік МУС
3 сакавіка, Позірк. Незанятасць з’яўляецца “адным з найважнейшых фактараў, якія ўплываюць на грамадскую бяспеку”, заявіў 3 сакавіка журналістам міністр унутраных спраў Беларусі Іван Кубракоў.
Паводле яго слоў, якія прыводзіць прэс-служба МУС, “непрацоўнымі здзяйсняецца пераважная большасць забойстваў і цяжкіх цялесных пашкоджанняў, крадзяжоў, рабаванняў, разбояў і махлярстваў”.
Кубракоў заявіў, што органы ўнутраных спраў дапамагаюць з працаўладкаваннем, што “разам з іншымі мерамі прафілактыкі дазваляе чыніць прэвентыўнае ўздзеянне на асобныя катэгорыі грамадзян”.
Паводле слоў міністра, “працаваць павінны ўсе, хто карыстаецца сацыяльнымі дабротамі, якія дае дзяржава”.
У чацвёртым квартале 2024 года ўзровень занятасці насельніцтва ў працаздольным узросце склаў 82,9%, што на 1,1 працэнтнага пункта менш, чым за аналагічны перыяд 2023-га, вынікае з праведзенага “Позіркам” аналізу даных Нацыянальнага статыстычнага камітэта па выніках рэгулярнага выбарачнага абследавання дамашніх гаспадарак.
Аналіз “Позірку” таксама паказаў, што ў студзені — снежні 2024 года колькасць звольненых у Беларусі работнікаў на 5,12% перавысіла колькасць нанятых — 683.322 супраць 650.052.
16 лістапада 2024 года ў Клімавічах (Магілёўская вобласць) на абласным свяце “Дажынкі” Аляксандр Лукашэнка заявіў, што першачарговай задачай з’яўляецца не дапускаць адтоку эканамічна актыўнага насельніцтва з рэгіёнаў.
Пры гэтым ён адзначыў, што “працаваць жадаюць далёка не ўсе”, і папярэдзіў: “Рыхтуйцеся, бамжоў, дармаедаў у краіне не будзе, усе павінны варушыцца, працаваць, зарабляць на сябе і сваю сям’ю”. “Мы дапаможам, дамо працоўнае месца, толькі ідзіце працаваць. Тыя, хто перашкаджаюць людзям жыць… рабяты, мы з вамі будзем сур’ёзна разбірацца, не крыўдуйце”, — заявіў спікер.
Дэкрэт № 3 “Аб прадухіленні сацыяльнага ўтрыманства” быў прыняты Аляксандрам Лукашэнкам у 2015 годзе і, паводле афіцыйнай версіі, павінен быў садзейнічаць занятасці. У 2017-м, калі адпаведныя катэгорыі грамадзян сталі атрымліваць з дзяржорганаў лісты з патрабаваннем “кампенсацыі дзяржаўных выдаткаў”, у многіх гарадах пачаліся масавыя пратэсты — “маршы недармаедаў”. У выніку дакумент быў адпраўлены на дапрацоўку.
У студзені 2018 года быў падпісаны дэкрэт № 1 “Аб садзейнічанні занятасці насельніцтва”, які адкарэктаваў дэкрэт № 3. У базу “дармаедаў” тады ўнеслі каля паўмільёна чалавек.
Пачынаючы з 1 студзеня 2019 года працаздольныя грамадзяне, што не занятыя ў эканоміцы, аплачваюць частку камунальных паслуг у поўным аб’ёме.
Пасля жніўня 2020 года з Беларусі, баючыся рэпрэсій, выехалі дзясяткі тысяч чалавек. Таксама ў апошнія гады колькасць занятых у беларускай эканоміцы скарачаецца на дзясяткі тысяч чалавек штогод.
МУС анансавала ў Мінску "пазапланавыя адпрацоўкі" асоб, не занятых у эканоміцы
17 лютага, Позірк. "Пазапланавыя адпрацоўкі" асоб, не занятых у эканоміцы, анансавала Галоўнае ўпраўленне ўнутраных спраў Мінгарвыканкама. Пра гэта паведамляецца ў тэлеграм-канале мінскай міліцыі па выніках праведзенай 17 лютага нарады па пытаннях "працы з асобамі, не занятымі працай". Адзначаецца, што кіраўнік …