Група жыхароў Курскай вобласці вярнулася з Украіны ў РФ праз Беларусь

3 сакавіка, Позірк. 33 жыхары Курскай вобласці вярнуліся з Украіны ў Расію праз Беларусь, паведаміў тэлеграм-канал расійскага амбудсмэна Таццяны Маскальковай.

Паводле яе, сярод вернутых ёсць чацвёра дзяцей, але большасць — састарэлыя людзі, многія з якіх хворыя або траўманыя.

“Для іх неадкладнай транспарціроўкі ў бальніцы Курска арганізавалі 10 машын хуткай дапамогі. Астатнія змогуць адпачыць і пераначаваць па дарозе дадому, а заўтра ўжо будуць з тымі, хто іх чакаў мацней за ўсё на свеце”, — адзначаецца ў паведамленні.

На месцы прыбыцця расіян на тэрыторыю Беларусі была старшыня пастаяннай камісіі Палаты прадстаўнікоў па працы і сацыяльных пытаннях, экс-кіраўнік Мінпрацы Ірына Касцевіч.

22 лістапада 2024 года тэлеграм-канал Маскальковай паведамляў, што з Украіны ў Расію праз Беларусь вярнуліся 46 жыхароў рэгіёна. Сцвярджалася, што гэтыя людзі былі вывезены ўкраінскімі вайскоўцамі.

На тэрыторыі Беларусі Расія і Украіна неаднаразова абменьваліся палоннымі.

У выніку перагаворнага працэсу з Украіны 5 лютага вернута 150 расійскіх ваеннаслужачых, узамен перададзены 150 ваеннапалонных УСУ.

Таксама абмен украінскімі і расійскімі ваеннапалоннымі на тэрыторыі Беларусі праходзіў 30 снежня 2024 года. Паводле расійскіх даных, тады таксама з абодвух бакоў было вернута па 150 ваеннапалонных, Кіеў заяўляў, што колькасць вызваленых украінскіх вайскоўцаў склала 189.

Усяго ў 2024 годзе Украіна і Расія правялі 11 абменаў ваеннапалоннымі, некаторыя з іх праходзілі з выкарыстаннем беларускай тэрыторыі.

Летась 8 лістапада на тэрыторыі Беларусі пры ўдзеле прадстаўнікоў Міжнароднага камітэта Чырвонага крыжа адбылася сустрэча ўпаўнаважаных па правах чалавека Украіны і Расіі Дзмітрыя Лубінца і Таццяны Маскальковай, на якой бакі абмеркавалі пытанні гуманітарнага характару.

На сустрэчы бакі абмяняліся спісамі ваеннапалонных, таксама “адбылася рэпатрыяцыя цел загінуўшых”.

Мінск падтрымлівае Маскву ў развязанай ёю поўнамаштабнай вайне супраць Украіны.