Лукашэнка даручыў міністру энергетыкі развіваць у Беларусі здабычу крыптавалют
4 сакавіка, Позірк. Развіваць у Беларусі здабычу крыптавалют даручыў перапрызначанаму міністру энергетыкі Аляксею Кушнарэнку Аляксандр Лукашэнка 4 сакавіка падчас зацвярджэння членаў урада.
“Паглядзіце па гэтым майнінгу. Усё больш людзей да мяне звяртаюцца. Калі нам гэта выгадна, давайце будзем рабіць, — цытуе спікера яго прэс-служба. — Маем лішак электрычнасці. Няхай робяць яны гэтую крыптавалюту і гэтак далей. Тым больш, вы бачыце, якім шляхам свет ідзе. І асабліва найбуйнейшая эканоміка свету. Яны ўчора абвясцілі, што ў рэзерве будуць трымаць (2 сакавіка прэзідэнт ЗША Дональд Трамп абвясціў пра намер стварыць дзяржаўны рэзерв крыптавалют. — “Позірк”.)“.
“Таму попыт на іх будзе. Ну, можа, і нам самім гэта рабіць. Што ж мы прыцягваем нейкіх інвестараў, прадаем ім электраэнергію, хаця я не выключаю гэта. Але трэба самім рабіць. Прапановы такія маюцца. Думаю, што вы перасягнеце гэтую бюракратыю і дакладзеце, што трэба рабіць”, — заявіў Лукашэнка.
Варта адзначыць, што сцвярджэнне спікера пра “лішак электраэнергіі” некарэктнае. Аб’ём электраэнергіі, якая вырабляецца і спажываецца, заўсёды знаходзіцца ў балансе. У Беларусі маецца лішак усталяванай магутнасці аб’ектаў энергетыкі — патэнцыял вытворчасці электрычнасці вышэйшы за фактычную генерацыю.
17 верасня 2024 года Лукашэнка падпісаў указ № 367, які забараняе фізічным асобам, у тым ліку індывідуальным прадпрымальнікам — рэзідэнтам Парка высокіх тэхналогій, купляць і прадаваць крыптавалюты па-за беларускімі крыптабіржамі (крыптаабменнікамі).
26 студзеня 2025 года ён заявіў, што ўлады падтрымаюць галіну высокіх тэхналогій па напрамках штучнага інтэлекту і крыптавалюты. Паводле яго слоў, у Беларусі “займаюцца стварэннем” крыптавалюты.
