Лукашэнка забараніў фізічным асобам і ІП гандляваць крыптавалютай па-за беларускімі біржамі

18 верасня, Позірк. Забарона на куплю і продаж крыптавалюты па-за беларускімі крыптабіржамі (крыптаабменнікамі) прадугледжаная указам Аляксандра Лукашэнкі № 367 “Аб абарачэнні лічбавых знакаў (такенаў)”.

Дакумент падпісаны 17 верасня, паведамляе прэс-служба Лукашэнкі.

Дзеянне ўказа распаўсюджваецца на “фізічных асоб, у тым ліку індывідуальных прадпрымальнікаў — рэзідэнтаў ПВТ”, гаворыцца ў паведамленні.

“Дакумент прыняты ў мэтах павышэння абароненасці грамадзян пры здзяйсненні здзелак з лічбавымі знакамі (такенамі), а таксама выключэння магчымасці ўключэння крыптавалюты ў ашуканскую і іншую супрацьпраўную дзейнасць”, — адзначае прэс-служба.

Сцвярджаецца, што ўказ “будзе спрыяць развіццю празрыстага і кантраляванага абарачэння лічбавых знакаў (такенаў), у першую чаргу крыптавалюты, і прадухіленню вываду з краіны выкрадзеных з банкаўскіх рахункаў грамадзян грашовых сродкаў шляхам іх абмену на крыптавалюту на замежных крыптапляцоўках”.

Указ уступае ў сілу пасля яго афіцыйнага апублікавання.

У тэксце дакумента гаворыцца, што ўрад да 1 чэрвеня 2025 года павінен унесці прапановы па “ўсталяванні адміністрацыйнай адказнасці за парушэнне патрабаванняў гэтага ўказа”.

У Беларусі дзейнічае некалькі крыптабірж, створаных у асноўным пры падтрымцы Парка высокіх тэхналогій (ПВТ): Currency, Bynex, Free2ex, Whitebird і інш.

Сілавыя органы Беларусі рэгулярна даюць справаздачу аб раскрыцці злачынстваў, уключаючы махлярства, з дапамогай крыптавалюты.

Масавыя палітычныя рэпрэсіі, пачатыя ўладамі пасля прэзідэнцкіх выбараў 2020 года, заахвоцілі тысячы беларускіх грамадзян аказваць грашовую падтрымку ахвярам пераследу. Частка ахвяраванняў фондам салідарнасці і іншым ініцыятывам ажыццяўляецца з дапамогай крыптавалюты. Улады пераследуюць ахвярадаўцаў у крымінальным парадку.