ДПК заявіў аб выяўленні на мяжы з Польшчай сямейнай пары мігрантаў, іх грамадзянства не называецца
7 сакавіка, Позірк. Аб выяўленні 6 сакавіка нелегальных мігрантаў у Свіслацкім раёне (Гродзенская вобласць) паведамляе Дзяржаўны пагранічны камітэт (ДПК).
Заяўляецца, што ў “непасрэднай блізкасці ад беларуска-польскай мяжы” была знойдзена сямейная пара, прычым жанчына была без прытомнасці.
Са спасылкай на словы мужчыны ведамства сцвярджае, што польскія памежнікі “пад пагрозай прымянення сілы” прымусілі іх вярнуцца з тэрыторыі Польшчы ў Беларусь. Пры гэтым жонка не магла самастойна перасоўвацца, мужчына нёс яе на руках, гаворыцца ў паведамленні.
Адзначаецца, што замежнікам была аказана медычная дапамога.
Адметна, што ДПК не называе грамадзянства мігрантаў. На апублікаваным пагранічнай службай відэа мужчына афрыканскай знешнасці гаворыць па-руску.
Беларускія ўлады рэгулярна паведамляюць аб пакутах, фізічных траўмах і гібелі замежнікаў на мяжы з краінамі ЕС, нязменна ўскладаючы адказнасць за гэта на супрацоўнікаў сілавых ведамстваў Польшчы, Літвы і Латвіі. Пры гэтым беларускі бок не паведамляе, як мігранты аказваюцца на мяжы з краінамі ЕС у зоне адказнасці памежнага ведамства.
Паводле звестак даклада “Бяспечнага шляху няма. Смерці мігрант_ак на мяжы Еўрапейскага саюза і Беларусі” праваабарончай арганізацыі Human Constanta, з вясны 2021-га па канец сакавіка 2024-га не менш за 116 нелегальных мігрантаў, у тым ліку 15 жанчын, памерлі на мяжы Беларусі з краінамі ЕС. Непасрэдна на тэрыторыі Беларусі на канец сакавіка 2024 года памерлі не менш за 47 чалавек.
З 2021 года на мяжы Беларусі з краінамі Еўрапейскага саюза загінулі 72 мігранты, паведаміў 19 снежня 2024 года намеснік начальніка галоўнага ўпраўлення аператыўна-вышуковай дзейнасці Дзяржаўнага памежнага камітэта (ДПК) Мікалай Барэйка. Адказнасць за гэта ён усклаў на “калег з сумежных дзяржаў”.
Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
