Лукашэнка падпісаў указ аб абмене з Расіяй данымі аб замежніках з трэціх краін

12 сакавіка, Позірк. Указ №107 “Аб інфармацыйнай сістэме абмену данымі аб замежных грамадзянах і асобах без грамадзянства” падпісаў 12 сакавіка Аляксандр Лукашэнка, паведамляе яго прэс-служба.

Адзначаецца, што дакумент прыняты “ў мэтах удасканалення падыходаў да фарміравання адзінай міграцыйнай прасторы на агульных прынцыпах дзяржаў — удзельніц Дагавора аб стварэнні Саюзнай дзяржавы”.

“Дакумент накіраваны на рэалізацыю беларуска-расійскага міжурадавага пагаднення аб узаемным прызнанні віз і па іншых пытаннях, звязаных з уездам замежных грамадзян і асоб без грамадзянства на тэрыторыю [Саюзнай дзяржавы]”, — гаворыцца ў паведамленні.

Указам прадугледжваецца “стварэнне інфармацыйнай сістэмы абмену звесткамі аб перасячэнні мяжы ў пунктах пропуску” асобамі з трэціх краін. Гаворка таксама ідзе пра абмен з РФ звесткамі аб “выдадзеных і канфіскаваных (ануляваных) дакументах на права ўезду і выезду (транзіту)”, а таксама дакументах, якія “сведчаць асобу замежных грамадзян і асоб без грамадзянства на тэрыторыі Саюзнай дзяржавы”.

“Функцыянаванне інфармацыйнай сістэмы дазволіць абменьвацца звесткамі ў электронным выглядзе ў рэжыме рэальнага часу аб грамадзянах трэціх краін, што павысіць аператыўнасць і спросціць працэдуры ўзаемадзеяння дзяржаўных органаў і арганізацый падчас забеспячэння нацыянальнай і грамадскай бяспекі”, — адзначае прэс-служба Лукашэнкі.

Пагадненне паміж Беларуссю і Расіяй аб узаемным прызнанні віз, падпісанае 19 чэрвеня 2020 года, пачало дзейнічаць 11 студзеня 2025 года.

Як адзначала беларускае Міністэрства замежных спраў, дакумент рэгулюе парадак “перасячэння замежнымі грамадзянамі і асобамі без грамадзянства сумеснай мяжы” Саюзнай дзяржавы, у тым ліку “сухапутнага ўчастка, які дагэтуль быў адкрыты толькі для грамадзян Беларусі і Расіі”.

Падпісанты пагаднення абавязаліся прызнаваць “візы, якія даюць права на ўезд і знаходжанне на тэрыторыі” кожнага з бакоў, а таксама “адзнакі аб перасячэнні знешняй мяжы Саюзнай дзяржавы”.

Замежныя грамадзяне і асобы без грамадзянства, якія маюць візу Беларусі або РФ, могуць перасякаць межы любой з гэтых дзяржаў на падставе пасведчання асобы на працягу ўсяго тэрміну дзеяння візы.

МЗС звяртаў увагу на тое, што для ўкраінскіх грамадзян захоўваецца “асаблівы парадак уезду” у РФ. “Згодна з рашэннем урада Расійскай Федэрацыі, грамадзяне Украіны ўязджаюць у Расію праз пункт пропуску ў маскоўскім аэрапорце Шарамеццева і аўтамабільны пункт пропуску Лудонка ў Пскоўскай вобласці”, — тлумачыла міністэрства.

Адзначалася, што кожны з бакоў “захоўвае за сабой права адмовіць ва ўездзе або скараціць тэрмін знаходжання на сваёй тэрыторыі любога замежнага грамадзяніна або асобы без грамадзянства, а таксама ажыццяўляць праверку выканання імі правілаў уезду, выезду, транзіту або рэжыму знаходжання”.

Пагадненне было названае “важным складальнікам агульнай міграцыйнай прасторы Саюзнай дзяржавы”.