У Беларусі каля 105 тыс. пацыентаў з глаўкомай

13 сакавіка, Позірк. У Беларусі на дыспансерным уліку знаходзіцца каля 105 тыс. пацыентаў з глаўкомай, паведамляе прэс-служба Міністэрства аховы здароўя.

Большасць з іх атрымлівае медыкаментознае лячэнне. Як самастойны метад прымяняецца лазернае лячэнне глаўкомы. Хірургічнае ўмяшанне выкарыстоўваецца ў выпадках, калі медыкаментознае і лазернае лячэнне неэфектыўнае ці немагчымае з якіх-небудзь прычын.

Згодна з інфармацыяй Мінздароўя, у Беларусі медыкаментознае, хірургічнае і лазернае лячэнне пацыентаў з глаўкомай у поўным аб’ёме праводзіцца за кошт бюджэту.

Ведамства падкрэслівае, што глаўкома можа працякаць бессімптомна да апошняй стадыі захворвання, калі ў пацыента значна пагаршаецца поле зроку і абцяжарваецца арыентацыя ў прасторы. Таму рэкамендуецца рэгулярна правярацца ў афтальмолага, а пацыентам з пацверджанай глаўкомай — яшчэ і датрымлівацца рэкамендаванага лячэння.

Звярнуцца да афтальмолага і правесці дыягностыку варта, калі маюцца скаргі на боль і пачуццё напружання ў воку; бачныя вясёлкавыя “арэолы” вакол крыніц святла або плямы перад вачыма; у пэўны час (часцей раніцай) затуманьваецца зрок; маецца пачырваненне вока; цяжка арыентавацца ў прасторы пры паніжанай асветленасці.

Глаўкома характарызуецца сталым або перыядычным падвышэннем унутрывочнага ціску з наступным развіццём тыповых дэфектаў поля зроку, зніжэннем вастрыні зроку і атрафіяй глядзельнага нерва.