Грамадзянін Японіі Наканісі Масатасі асуджаны на сем гадоў пазбаўлення волі

17 сакавіка, Позірк. Мінскі гарадскі суд прыгаварыў грамадзяніна Японіі Наканісі Масатасі паводле арт. 358¹ Крымінальнага кодэкса (агентурная дзейнасць) да сямі гадоў пазбаўлення волі з адбываннем пакарання ў папраўчай калоніі ва ўмовах узмоцненага рэжыму са штрафам у памеры 500 базавых велічыняў (21 тыс. рублёў), паведамляе Генеральная пракуратура.

Па версіі абвінавачання, ён ажыццяўляў яе з 2018 па 2024 гады.

“Суд прызнаў абвінавачанага вінаватым у супрацоўніцтве замежнага грамадзяніна са спецыяльнай службай, органам бяспекі і разведвальным органам замежнай дзяржавы, спалучаным з дзеяннямі, загадзя накіраванымі на прычыненне шкоды нацыянальнай бяспецы Рэспублікі Беларусь, пры адсутнасці прыкмет іншых больш цяжкіх злачынстваў супраць дзяржавы”, — гаворыцца ў рэлізе.

Суд разглядаў справу грамадзяніна Японіі з 10 студзеня ў закрытым рэжыме. Суддзя — Анжэла Касцюкевіч, якая раней вынесла шэраг палітычна матываваных прысудаў.

Наканісі Масатосі затрымалі ў ліпені 2024 года, пра што стала вядома 5 верасня іх рэпартажу “Правал “самурая“ з Токіа“ на тэлеканале “Беларусь 1“.

Начальнік Следчага ўпраўлення КДБ Канстанцін Бычак тады сцвярджаў, што іншаземец, знаходзячыся на тэрыторыі Беларусі, ажыццяўляў збор і перадачу ў адрас японскай спецслужбы “разведвальнай інфармацыі ваеннага характару, у прыватнасці, аб беларускай ваеннай інфраструктуры, аб перамяшчэнні войскаў і ваеннай тэхнікі, аб бягучай сітуацыі на паўднёвым напрамку”.

У матэрыяле было сказана, што Наканісі Масатасі пераехаў у Гомель у 2018 годзе. З абласнога цэнтра ён нібыта ездзіў у раён беларуска-ўкраінскай мяжы, дзе “здымаў дарогі, масты, стратэгічныя аб’екты, кшталту вакзалаў ці аэрапортаў, інфраструктуру ваенных аб’ектаў, а таксама чыгуначныя пуці, напрыклад, там, дзе ляжаць вузкакалейныя рэйкі“.

Сцвярджалася, што падазраваны за шэсць гадоў жыцця ў Беларусі зрабіў больш за 9 тыс. “дакладных фатаграфій з беларуска-ўкраінскага прыгранічча”, якія ён “баяўся перадаваць па інтэрнеце, а хацеў выключна асабіста, у рукі” аддаць “куратарам” пасля прыбыцця ў Японію.

Пра затрыманне ў Беларусі яшчэ аднаго японскага грамадзяніна за здымку аб’ектаў чыгуначнай інфраструктуры стала вядома 3 снежня мінулага года.