Міліцыя не дазволіла вывезці з Беларусі каля 22 т каляровых металаў

24 сакавіка, Позірк. Пра спыненне вывазу з Беларусі партыі каляровых металаў паведаміла 24 сакавіка прэс-служба Міністэрства ўнутраных спраў са спасылкай на начальніка аддзела Упраўлення па барацьбе з эканамічнымі злачынствамі УУС Мінскай вобласці Уладзіміра Роўду.

Міліцэйскі чыноўнік у відэакаментарыі паведаміў, што ў Стаўбцоўскім раёне падчас праверкі аўтамабіля “Сканія” міліцыянты знайшлі 22 тоны лому каляровых металаў без суправаджальных дакументаў.

Кіроўца — 60-гадовы жыхар Полацка (Віцебская вобласць) — заявіў, што збіраў каляровы метал на тэрыторыі Баранавічаў (Брэсцкая вобласць), каб пасля вывезці і прадаць у Расіі.

Груз коштам звыш 41 тыс. рублёў канфіскаваны. У дачыненні да мужчыны складзены адміністрацыйны пратакол за “парушэнне парадку вывазу з Беларусі лому і адходаў чорных і каляровых металаў”. Яму пагражае “буйны штраф і канфіскацыя прадмета правапарушэння”.

У лютым МУС паведамляла пра затрыманне 5,3 тон каляровых металаў, якія спрабаваў вывезці ў РФ жыхар Оршы (Віцебская вобласць).

У 2024 годзе спробы вывазу з Беларусі ў РФ лому каляровых металаў спыняліся неаднаразова. Пра іх паведамлялася на працягу ўсяго года.