Тбіліскі гарсуд часткова задаволіў скаргу беларускага праваабаронцы Кісляка на адмову ў прытулку
Раман Кісляк
26 сакавіка, Позірк. Тбіліскі гарадскі суд часткова задаволіў скаргу беларускага праваабаронцы Рамана Кісляка на адмову ў прытулку.
“Як я зразумеў са слоў адваката, Дэпартамент міграцыі МУС павінен паўторна разгледзець маю справу“, — паведаміў “Позірку” Кісляк.
Паводле яго слоў, суд меркавана не задаволіў яго патрабаванне выдаць новы адміністрацыйна-прававы акт аб статусе ўцекача.
Апошняе пасяджэнне суда па скарзе Кісляка адбылося 19 сакавіка, пасля чаго суддзя ўзяла тыдзень на вынясенне рашэння.
“Для беларусаў у Грузіі гэта першы выпадак, калі скарга на адмову ў прытулку задавальняецца хаця б часткова“, — адзначыў праваабаронца. Са сваімі далейшымі дзеяннямі ён плануе вызначыцца ў бліжэйшы час пасля кансультацый з адвакатам.
У 2019-2024 гадах Грузія не задаволіла ніводнага хадайніцтва беларускіх грамадзян аб прадастаўленні прытулку.
Як паведамляў “Позірк“, 19 сакавіка на пасяджэнні Тбіліскага гарадскога суда Дэпартамент міграцыі МУС пісьмова прадставіў свае аргументы суддзі і папрасіў адмовіць у задавальненні скаргі.
21 сакавіка ў Тбіліскім гарсудзе прайшло папярэдняе пасяджэнне па скарзе на адмову Дэпартамента міграцыі МУС даць прытулак дэлегату Каардынацыйнай рады, былой прафесійнай спартсменцы Марыне Зялёнай (Калінінай) і яе малалетняму дзіцяці.