Суд у ЗША адмяніў рашэнне аб спыненні фінансавання “Радыё Свабода”
27 сакавіка, Позірк. Агенцтва ЗША па глабальных медыя (USAGM) 26 сакавіка паведаміла ў лісце кіраўніцтву “Радыё Свабодная Еўропа/ Радыё Свабода” (РСЕ/РС) аб адмене рашэння аб спыненні фінансавання медыя.
У лісце гаворыцца, што адпаведную пастанову вынес суд. Згодна з рашэннем, прыпыненае раней “грантавае пагадненне” паміж USAGM і “Радыё Свабода” “зноў уступае ў сілу”.
Пры гэтым адзначаецца, што гэтае рашэнне “не наносіць шкоды паўнамоцтвам USAGM спыніць дзеянне гранта ў больш позні тэрмін, калі USAGM палічыць такое спыненне мэтазгодным у адпаведнасці з дзеючым заканадаўствам”.
Слуханне па пазове медыякарпарацыі “РСЕ/РС” да USAGM прайшло ў Вашынгтоне 24 сакавіка. Пазоў быў пададзены з мэтай “пазбегнуць непапраўнай шкоды” для вяшчальнай кампаніі ў сувязі з пазбаўленнем яе гранта, раней ухваленага Кангрэсам ЗША.
14 сакавіка прэзідэнт ЗША Дональд Трамп падпісаў указ, які прадугледжвае масавыя скарачэнні супрацоўнікаў у сямі федэральных агенцтвах, у тым ліку ў USAGM.
У дакуменце гаворыцца, што арганізацыі “павінны скараціць выкананне сваіх статутных функцый і адпаведны персанал да мінімальнага прысутнасці і функцый, патрэбных па законе”. Да 21 сакавіка кіраўнікі агенцтваў павінны былі накіраваць у Белы дом справаздачы аб выкананні патрабаванняў указа.
Раней СМІ паведамілі, што пасля публікацыі ўказу журналісты “Голасу Амерыкі” атрымалі паведамленні пра тое, што іх адправілі ў незапланаваны адпачынак з захаваннем заработнай платы. Таксама паведамлялася, што ўхваленае Кангрэсам грантавае фінансаванне “Радыё Свабода / Радыё Свабодная Еўропа” спыненае.
Выданні, якімі кіруе USAGM, вяшчаюць на 49 мовах. Штотыднёвая аўдыторыя СМІ складае больш за 361 млн чалавек.
“Радыё Свабода/Радыё Свабодная Еўропа” заснавана ў 1949 годзе. Беларуская служба “РС” пачала вяшчанне ў 1954-м. Пасля падзей 2020 года цалкам працуе з-за мяжы. Прызнанае “экстрэмісцкім фарміраваннем”. Шэраг супрацоўнікаў быў падвергнуты палітычным рэпрэсіям. Праз крымінальныя тэрміны прайшлі журналісты Алег Груздзіловіч і Андрэй Кузнечык. На сёння ў няволі і ў статусе палітвязняў застаюцца звязаныя з “РС” Ігар Карней і Ігар Лосік.
Пасля абвяшчэння рашэння аб спыненні фінансавання ў падтрымку “Радыё Свабода” выступілі беларускія дэмакратычныя сілы, уключаючы Аб’яднаны пераходны кабінет, Беларуская асацыяцыя журналістаў і інш.