За суткі ад агню загінула пяць чалавек, МНС зноў паменшыла агульныя звесткі па смяротнасці

29 сакавіка, Позірк. За мінулыя дзяжурныя суткі (з 6:00 28 сакавіка па 6:00 29 сакавіка) на пажарах і ад іх наступстваў у Беларусі загінула пяць чалавек, сведчыць інфармацыя Міністэрства па надзвычайных сітуацыях.

Па адным чалавеку загінула ў Докшыцкім і Аршанскім раёнах (Віцебская вобласць), два — у Асіповіцкім раёне (Магілёўская вобласць).

У бальніцы Гомеля памёр яшчэ адзін чалавек — пацярпелы на пажары 10 сакавіка.

Ад пачатку 2025 года ў Беларусі адбылося 1.925 пажараў (за аналагічны перыяд 2024-га — 1.391; +38,4%).

За гэты час, паводле статыстычных даных міністэрства, агонь забраў жыцці 210 чалавек (154; +36,4%). Аднак напярэдадні ведамства паведамляла пра 206 загінулых. Такім чынам, у зводнай табліцы, якую МНС абнаўляе штодня, зноў адбылося карэктаванне звестак па смяротнасці на пажарах — у бок памяншэння. “Позiрк” ужо некалькі разоў звяртаў на гэта ўвагу.

У Беларусі фіксуецца “сур’ёзная праблематычная сітуацыя” з гібеллю людзей на пажарах, заявіў на прэс-канферэнцыі 4 сакавіка ў Мінску памочнік міністра па надзвычайных сітуацыях, прэс-сакратар МНС Яўген Бараноўскі.

“Вельмі сур’ёзны рост, такі непрыемны рост [колькасці загінулых]”, — сказаў ён.

Асноўная прычына, з якой павялічваецца колькасць пажараў, — неасцярожнае абыходжанне з агнём, у першую чаргу звязанае з курэннем у стане алкагольнага ап’янення, адзначыў прадстаўнік МНС.

“Сёння мы рэалізуем дастаткова дакладны, адрасны, на падставе сур’ёзнага аналізу комплекс прафілактычных мер, — паведаміў Бараноўскі. — І мы бачым партрэт групы рызыкі. Мы ўсе цудоўна ведаем, што пажары ў асноўным адбываюцца ў начны час сутак, ахвярамі агню становяцца людзі, якія вядуць асацыяльны лад жыцця. Гэта людзі сталага веку, якія жывуць самотна, пенсіянеры, інваліды”.

“Сёння на дзяржаўным узроўні, у рамках працы ўсіх зацікаўленых суб’ектаў прафілактыкі (не толькі МНС) <…> робіцца ўсё для таго, каб стабілізаваць гэтую абстаноўку, але разам з тым праблема існуе”, — заявіў ён.