Загінулыя напярэдадні ад агню ў Асіповіцкім раёне — пажылая пара, абставіны вывучаюць следчыя

29 сакавіка, Позірк. Праверку па факце гібелі пажылой пары на пажары ў Асіповіцкім раёне (Магілёўская вобласць) ладзіць раённы аддзел Следчага камітэта, паведамляе прэс-служба СК.

Паводле інфармацыі следства, “позна ўвечары 28 сакавіка ў вёсцы Углата пры ліквідацыі пажару ў доме на лецішчы супрацоўнікі МНС знайшлі целы мужчыны і жанчыны, як мяркуецца, мужа і жонкі (90 і 91 год)”.

“Высветлена, што пара з Мінска пражывала ў доме сезонна. Нягледзячы на ​​сталы ўзрост, муж і жонка вялі актыўны лад жыцця, алкаголем не злоўжывалі, не палілі. Суседзі і работнікі сельскага выканкама характарызуюць іх станоўча”, — гаворыцца ў паведамленні.

Следчыя, як адзначаецца, разглядаюць “розныя версіі ўзнікнення пажару”, у тым ліку “кароткае замыканне праводкі”.

Пра гібель двух чалавек на пажары ў Асіповіцкім раёне раней паведаміла Міністэрства па надзвычайных сітуацыях, не прывёўшы ніякіх падрабязнасцяў.

Паводле даных МНС, ад пачатку 2025 года ў Беларусі адбылося 1.925 пажараў (за аналагічны перыяд 2024 года — 1.391; +38,4%).

За мінулыя суткі, паводле статыстычных даных міністэрства на 29 сакавіка, на пажарах і з прычыны атрыманых у папярэднія дні апёкаў памерла 5 чалавек, ад пачатку года — 210 (154; +36,4%). Аднак напярэдадні ведамства паведамляла пра 206 загінулых. Такім чынам, у зводнай табліцы, якую МНС абнаўляе штодня, зноў адбылося карэктаванне даных пра смяротнасць на пажарах — у бок заніжэння. “Позiрк” ужо некалькі разоў звяртаў на гэта ўвагу.