Памочнік Лукашэнкі, экс-кіраўнік МУС Караеў узначаліў Гродзенскую вобласць (дапоўнена)
Юрый Караеў
31 сакавіка, Позірк. Старшынёй Гродзенскага аблвыканкама прызначаны абласны інспектар (памочнік прэзідэнта), міністр унутраных спраў у 2019–2020 гадах Юрый Караеў. Адпаведнае рашэнне 31 сакавіка прыняў Аляксандр Лукашэнка, паведамляе неафіцыйны тэлеграм-канал яго прэс-службы.
3 сакавіка Лукашэнка прапанаваў прызначанаму ў той дзень намеснікам прэм’ер-міністра Уладзіміру Караніку (раней кіраваў Гарадзенскай вобласці) “перадаць пасаду” Караеву.
Кіраўніку сваёй адміністрацыі Дзмітрыю Крутому Лукашэнка даручыў падрыхтаваць указ аб прызначэнні Караева на пасаду кіраўніка рэгіёна.
Караеў нарадзіўся ў Паўночнай Асеціі (цяпер Расія), у Беларусі застаўся пасля службы ў войску ў 1980-х гадах.
Як адказны за рэпрэсіі 2020 года ўключаны ў санкцыйныя спісы ЕС, ЗША, Вялікабрытаніі, Канады, Швейцарыі, Албаніі, Ісландыі, Ліхтэнштэйна, Нарвегіі, Паўночнай Македоніі, Чарнагорыі, Украіны.
Займаў пасаду міністра ўнутраных спраў Беларусі з 11 чэрвеня 2019 па 29 кастрычніка 2020 года, з 29 кастрычніка 2020 года быў памочнікам Лукашэнкі — інспектарам па Гродзенскай вобласці.
