У 2024 годзе агульная колькасць грашовых падробак зменшылася на 28,1%

31 сакавіка, Позірк. У 2024 годзе ў Беларусі было выяўлена 795 падробленых грашовых знакаў (793 банкноты і 2 манеты) — на 28,1% менш, чым за 2023 (1.105), паведамляе прэс-служба Нацыянальнага банка.

Сярод выяўленых падробак больш за ўсё (83,1%) долараў ЗША — 661 адзінка (годам раней — 971). Фальшывых расійскіх рублёў знойдзена 72 адзінкі (62), еўра — 54 (49), беларускіх рублёў — 7 (21).

Паводле інфармацыі Нацбанка, у Мінску выяўлена 41,4% ўсіх падробленых грашовых знакаў. Падробкі былі вынятыя з грашовага абарачэння ў 60 населеных пунктах.

Выяўленыя падробленыя долары з’яўляліся “раней вядомымі разнавіднасцямі падробак”, адзначае рэгулятар.

“Ацэнка скарыстаных спосабаў вырабу выяў падробленых банкнот сведчыць пра тое, што з выкарыстаннем паліграфічных тэхналогій выраблена больш за 95% падробленых долараў (у асноўным плоскі друк, а таксама глыбокі друк), 78% падробленых еўра (у асноўным плоскі друк, а таксама глыбокі друк), 8% падробленых расійскіх рублёў (плоскі друк). Для вырабу выяў астатніх падробленых банкнот выкарыстаныя тэхналогіі рэпраграфіі — прынтэрныя прылады (у асноўным струменевы друк, а таксама электрафатаграфія)“, — падкрэсліў Нацбанк.