Камітэт Сейма Літвы па нацбяспецы падтрымаў узмацненне санкцый у дачыненні да грамадзян Беларусі і РФ

3 красавіка, Позірк. Камітэт Сейма Літвы па нацыянальнай бяспецы і абароне 3 красавіка аднагалосна падтрымаў увядзенне больш строгіх нацыянальных санкцый у дачыненні да грамадзян Беларусі і Расіі, паведамляе LRT.

Пастрожанне абмежавальных мер таксама падтрымалі прадстаўнікі прэзідэнта і Дэпартамента дзяржаўнай бяспекі (ДДБ). Разам з тым прапановы раскрытыкавалі бізнес-арганізацыі.

Гаворка ідзе пра прапановы кансерватараў Лаўрынаса Кашчунаса, Аўдронюса Ажубаліса і Валдаса Ракуціса пра тое, каб прыпыніць выдачу дазволу на жыхарства грамадзянам Беларусі і РФ, калі тыя не маюць дзейнай візы.

Дзейныя ДНЖ, згодна з прапановамі, павінны анулявацца, калі беларусы і расіяне ездзяць у свае родныя краіны больш за адзін раз на працягу трох каляндарных месяцаў.

На думку кансерватараў, у Беларусі гэтыя людзі могуць быць завербаваныя спецслужбамі, ім можа быць даручанае выкананне “пэўных выведніцкіх функцый”.

Выключэнне прапанавана зрабіць для перавозчыкаў і кіроўцаў грузавікоў, якія накіроўваюцца транзітам праз Беларусь і РФ, калі паездка “мела аб’ектыўныя прычыны, што не залежаць ад грамадзяніна”.

Дарадца прэзідэнта Марус Чэснулявічус пацвердзіў: кіраўнік дзяржавы Гітанас Наўседа па-ранейшаму прытрымліваецца пазіцыі, што да грамадзян Расіі і Беларусі павінны прымяняцца аднолькавыя абмежавальныя меры. “Мы не бачым розніцы паміж крамлёўскім і мінскім рэжымамі”, — сказаў ён.

Генеральны дырэктар Міжнароднага транспартна-лагістычнага альянсу Повілас Дрыжас заявіў, што ў транспартных кампаніях Літвы працуе каля 36 тыс. беларусаў, пасля ўвядзення санкцый іх колькасць стала змяншацца. Паводле яго слоў, існай праверкі работнікаў цалкам дастаткова, “яна дзейнічае”, кампаніі супрацоўнічаюць з ДДБ, падаючы інфармацыю.

Паводле слоў дарадцы Канфедэрацыі бізнесу Аквіле Разувене, прапанаваныя новыя абмежаванні прывядуць да скарачэння колькасці беларусаў, якія працуюць у Літве, што ўчыніць “вялікі, непрапарцыйны ўплыў” на літоўскую эканоміку.

Канчатковае рашэнне па гэтых прапановах прыме Сейм.

23 сакавіка Міністэрства ўнутраных спраў Літвы “выказала занепакоенасць” у сувязі з ініцыятывай дэпутатаў-кансерватараў пастрожыць абмежаванні адносна грамадзян Беларусі і Расіі, якія пражываюць у краіне. Ведамства мяркуе, што прапанаваныя меры створаць значную нагрузку на Службу аховы дзяржаўнай мяжы і Дэпартамент міграцыі пры МУС, а ў некаторых выпадках могуць аказацца цяжка рэалізаванымі.

13 сакавіка стала вядома, што МЗС Літвы прапануе Сейму падоўжыць на год нацыянальныя санкцыі ў дачыненні да грамадзян Беларусі і РФ — да 2 траўня 2026-га.

У адпаведнасці з законам аб санкцыях, які парламент Літвы ўпершыню прыняў у 2023 годзе, прыпынены прыём заяў на атрыманне шэнгенскіх і нацыянальных віз ад грамадзян Беларусі і РФ за выключэннем выпадкаў, калі літоўскае МЗС выступае пасярэднікам у прыёме дазволаў на часовае пражыванне. Выключэнне робіцца толькі для тых, хто мае дзейную шэнгенскую або нацыянальную візу, дазвол на жыхарства ў Літве ці іншай краіне ЕС.

Беларусаў і расіян, якія прыбываюць з-за межаў ЕС, дадаткова правяраюць на наяўнасць пагроз нацыянальнай бяспецы, грамадскаму, дзяржаўнаму парадку, унутранай бяспецы.