У Пінску ў ванне патанула малалетняе дзіця

3 красавіка, Позірк. Аб гібелі ў ванне дзяўчынкі 2024 года нараджэння паведаміла 3 красавіка Таварыства ратавання на водах (ТРВОД).

Трагедыя адбылася напярэдадні ў Пінску (Брэсцкая вобласць).

“Меркавана маці пакінула дзіця без нагляду ў ваннай. Абставіны гібелі высвятляюцца. Прызначаная судова-медыцынская экспертыза”, — адзначае ТРВОД.

Раней паведамлялася, што 27 і 28 сакавіка ў Мінску ў ваннах загінулі два чалавекі: пенсіянер (1939 г.н.) у кватэры дома па вул. Матусевіча і мужчына (1983 г.н.) — па вуліцы Цімашэнка.

У 2024 годзе ў Беларусі ад знешніх прычын загінула 126 дзяцей — на 34% больш, чым у 2023-м (94), паведаміў на прэс-канферэнцыі 24 сакавіка ў Мінску намеснік начальніка галоўнага ўпраўлення — начальнік упраўлення па наглядзе ў сацыяльнай сферы Генеральнай пракуратуры Павел Зайцаў.

Паводле яго слоў, асноўнымі прычынамі гібелі былі суіцыды, дарожна-транспартныя здарэнні, утапленні і пажары (лічбы па кожнай катэгорыі спікер не прывёў).

“У большасці выпадкаў гібель была абумоўленая дзіцячай неасцярожнасцю і бестурботнасцю, — падкрэсліў Зайцаў. — Часцяком бацькі неналежным чынам выконвалі свае абавязкі па выхаванні і ўтрыманні дзяцей”.