АПК папярэджвае пра фэйкавае апытанне нібыта ад яго імя

9 красавіка, Позірк. У публічных тэлеграм-чатах нібыта ад імя Аб’яднанага пераходнага кабінета (АПК) распаўсюджваецца “вельмі падобная да арыгінальнай” анкета “Апытанне для маладых беларусаў і беларусак”, якая ў тым ліку збірае адрасы электроннай пошты ўдзельнікаў апытання. Пра гэта паведаміла 9 красавіка прадстаўніца па маладзёжнай палітыцы і студэнцтве АПК Маргарыта Варыхава.

Яна заклікала быць уважлівымі і не давяраць інфармацыі, якая распаўсюджваецца праз неправераныя кантакты і ананімныя акаўнты, не запаўняць падазроных апытанняў і паведамляць пра такія выпадкі ў АПК.

Таксама Ворыхава прывяла спасылку на актуальную анкету узначаленага ёю прадстаўніцтва, якая распаўсюджваецца толькі праз афіцыйныя акаўнты кабінета і платформу “Гэта моладзь”.

Беларускія сілавікі рэгулярна звяртаюцца да практыкі стварэння фальшывых акаўнтаў, ботаў і інш., у тым ліку — для збору інфармацыі аб прыхільніках беларускіх дэмакратычных сіл, якія знаходзяцца за мяжой, іх дэананімізацыі.

У прыватнасці, аб з’яўленні фальшывых тэлеграм-каналаў і ботаў паведамлялі 10 лютага фонд салідарнасці BySol і рэдакцыя гомельскага рэгіянальнага сайта “Флагшток” (працуе за мяжой).