За суткі ад агню загінулі тры чалавекі

6 красавіка, Позірк. Тры чалавекі загінулі ад агню за мінулыя дзяжурныя суткі (з 6 гадзін 5 красавіка да 6 гадзін 6 красавіка), вынікае са зводкі Міністэрства па надзвычайных сітуацыях.

Гібель людзей зафіксавана ў Валожынскім і Маладзечанскім раёнах (Мінская вобласць), а таксама ў Кіраўскім (Магілёўская вобласць).

Паводле звестак МНС, з пачатку года на тэрыторыі краіны адбылося 2.104 пажары (за аналагічны перыяд 2024-га — 1.530; +38,2%), на якіх загінулі 223 чалавекі (170; +31,2%).

У Беларусі фіксуецца “сур’ёзная праблематычная сітуацыя” з гібеллю людзей на пажарах, заявіў на прэс-канферэнцыі 4 сакавіка ў Мінску памочнік міністра па надзвычайных сітуацыях, прэс-сакратар МНС Яўген Бараноўскі.

“Вельмі сур’ёзны рост, такі непрыемны рост [колькасці загінуўшых]”, — сказаў ён.

Асноўная прычына, з якой павялічваецца колькасць пажараў, — неасцярожнае абыходжанне з агнём, у першую чаргу звязанае з паленнем у стане алкагольнага ап’янення, адзначыў прадстаўнік МНС.