“Мінскэнерга” ўдакладніў даныя — з-за непагадзі электразабеспячэнне было парушана ў 234 населеных пунктах вобласці, а не 130

6 красавіка, Позірк. З прычыны непагадзі электразабеспячэнне было парушана ў 234 населеных пунктах Мінскай вобласці, вынікае з удакладненых даных РУП “Мінскэнерга”.

“На бягучы момант адноўлена стабільнае электразабеспячэнне ў 91 населеным пункце, у той час як працы працягваюцца ў 143 населеных пунктах”, — гаворыцца ў паведамленні арганізацыі.

Адзначаецца, што ў работах па ліквідацыі наступстваў непагадзі задзейнічаны 62 спецыялізаваныя брыгады, 82 адзінкі спецтэхнікі, выкарыстоўваецца 12 перасовачных дызельных электрастанцый.

Раней 6 красавіка “Мінскэнерга” паведамляў аб парушэнні электразабеспячэння ў “больш чым 130 населеных пунктах”.

Паводле даных РУП” Магілёўэнерга”, у Магілёўскай вобласці перабоі з электраэнергіяй узніклі ў 142 населеных пунктах.

Аб пашкоджаннях ліній электраперадачы ў іншых рэгіёнах не паведамляецца.

Напярэдадні ў Беларусі істотна пахаладала, быў абвешчаны аранжавы ўзровень небяспекі. Па краіне прайшлі дажджы і снегапады, быў моцны вецер. Паводле прагнозаў Белгідрамета, халоднае надвор’е захаваецца ў бліжэйшыя дні.