Энергетыкі працягваюць аднаўляць электразабеспячэнне ў 68 населеных пунктах

7 красавіка, Позірк. Па стане на 15:00 электразабеспячэнне не адноўлена ў 68 населеных пунктах, паведамляе дзяржаўнае аб’яднанне “Белэнерга”.

Адзначаецца, што аварыйна-аднаўленчыя брыгады “аператыўна займаюцца аднаўленнем энергазабеспячэння населеных пунктаў, якія пацярпелі ад стыхіі”, найбольш складаная сітуацыя “па-ранейшаму застаецца ў Магілёўскай вобласці”.

Паводле даных “Белэнерга”, у работах занятыя 90 брыгад, задзейнічана 88 адзінак спецыяльнай тэхнікі. “Улічваючы неспрыяльны прагноз надвор’я” на найбліжэйшыя суткі, “ажыццяўляецца пастаянны маніторынг аператыўнай абстаноўкі, каб неадкладна рэагаваць на няштатныя сітуацыі, якія ўзнікаюць”, гаворыцца ў паведамленні.

Міністэрства энергетыкі раней паведамляла, што апоўдні 7 красавіка спецыялісты аднаўлялі электразабеспячэнне ў 63 населеных пунктах Беларусі, над гэтым працавалі 103 брыгады, абсталяваныя 122 адзінкамі тэхнікі.

Напрыканцы мінулага тыдня ў Беларусі істотна пахаладала, быў абвешчаны аранжавы ўзровень небяспекі. Па краіне прайшлі дажджы і снегапады, быў моцны вецер. Паводле прагнозаў Белгідрамета, халоднае надвор’е захаваецца ў бліжэйшыя дні.

З-за непагадзі электразабеспячэнне было парушана ў больш чым 650 населеных пунктах, паведамляла раней Мінэнерга.