Літоўскія мытнікі канфіскавалі на мяжы з Беларуссю царкоўны звон масай 260 кг
7 красавіка, Позірк. На кантрольна-прапускным пункце Шальчынінкай (з беларускага боку — Беняконі) у грамадзяніна Малдовы канфіскаваны царкоўны звон масай 260 кг, паведамляе Мытная служба Літвы.
Адзначаецца, што мужчына вёз груз з Беларусі ў Літву 16 сакавіка.
Звон быў знойдзены ў аўтамабілі Mercedes Sprinter, дакументаў, якія пацвярджаюць паходжанне і прыналежнасць грузу, кіроўца не прадставіў.
Падазраючы, што звон можа з’яўляцца гісторыка-культурнай каштоўнасцю, выкрадзенай на тэрыторыі Украіны, мытнікі канфіскавалі яго для правядзення экспертызы.
