Літоўскі верталёт будзе суправаджаць транзітныя цягнікі, якія курсуюць паміж Беларуссю і Калінінградскай вобласцю
7 красавіка, Позірк. Служба аховы дзяржаўнай мяжы Літвы 7 красавіка прадставіла новы верталёт, які будзе выкарыстоўвацца для суправаджэння расійскіх цягнікоў, якія ідуць транзітам праз краіну паміж Беларуссю і Калінінградскай вобласцю РФ, паведамляе LRT са спасылкай на інфармагенцтва BNS.
“Гэты верталёт дапаможа ўзмацніць назіранне за цягнікамі, якія едуць у Калінінградскую вобласць і з яе”, — заявіў міністр унутраных спраў Літвы Уладзіслаў Кандратовіч.
Кошт верталёта Н145 складае 11 млн еўра. Адзначаецца, што ён набыты на сродкі ЕС для забеспячэння бяспекі транзітнага маршруту па тэрыторыі Літвы. У матэрыяле не ўдакладняецца, якія менавіта цягнікі — пасажырскія або грузавыя — ён будзе суправаджаць.
17 студзеня мінулага года двое грамадзян Беларусі 1980 і 1972 гадоў нараджэння выйшлі з вагона цягніка, які рухаўся транзітам праз тэрыторыю Літвы, і былі спыненыя супрацоўнікамі службы бяспекі чыгуначнай станцыі ў Вільнюсе.
Паведамлялася, што беларусаў вярнулі ў цягнік, і каб пазбегнуць паўтарэння спробаў трапіць на тэрыторыю Літвы суправадзілі да мяжы з Беларуссю.
Улады Літвы неаднаразова выказвалі асцярогі, што беларусы, якія знаходзяцца або прыязджаюць у краіну, могуць быць завербаваныя спецслужбамі сваёй дзяржавы.
3 снежня 2023 года кіраўнік Дэпартамента дзяржаўнай бяспекі (ДДБ) Літвы Дарус Яўнішкіс заявіў у інтэрв’ю LRT, што частка грамадзян Беларусі “ездзіць туды і назад, ездзіць з Літвы ў Беларусь” і ўяўляе цікавасць для беларускіх спецслужбаў.
“Вядома, у іх там ёсць сваякі і пэўныя інтарэсы, тым больш у іх ёсць беларускія пашпарты. Але гэта, без сумневу, стварае беларускім спецслужбам пэўныя магчымасці для вярбоўкі, для аказання ўплыву, збору інфармацыі аб працэсах у Літве”, — сказаў Яўнішкіс.
Кіраўнік ДДБ падкрэсліў, што вярбоўкай можа займацца не толькі беларускі КДБ, але і іншыя сілавыя структуры.
“У Беларусі ёсць яшчэ і ГРУ, так званая ваенная выведка, а таксама так званы ГУБАЗіК, гэта значыць упраўленне МУС па барацьбе з арганізаванай злачыннасцю і карупцыяй”, — адзначыў Яўнішкіс.
Актыўнасць беларускіх спецслужбаў у Літве, дадаў ён, узрасла з 2020 года, пасля таго “як усе пратэсты і ўсе падзеі ў Беларусі скончыліся”, пазней “трыгерам паслужыла агрэсія Расіі супраць Украіны”.
Працягласць літоўскага ўчастка чыгункі па маршруце Калінінград — Масква складае 219 км.
