На вучэннях у Пастаўскім раёне тэрытарыяльныя войскі будуць змагацца з дыверсантамі “умоўнага праціўніка”

11 красавіка, Позірк. Камандна-штабныя вучэнні з тэрытарыяльнымі войскамі Пастаўскага раёна (Віцебская вобласць) пройдуць 11–13 красавіка, паведамляе прэс-служба Міністэрства абароны.

Паводле інфармацыі ведамства, мэта мерапрыемстваў заключаецца ва ўдасканаленні “навыкаў службовых асоб па кіраванні падпарадкаванымі сіламі” тэрытарыяльнай абароны, “навучанні асабовага складу выкананню сваіх абавязкаў на штатных пасадах пры вырашэнні задач” тэраабароны, ацэнцы “гатоўнасці падраздзяленняў тэрытарыяльных войскаў да вырашэння задач, якія стаяць перад імі”.

“Падраздзяленні тэрытарыяльных войскаў адпрацуюць пытанні аховы і абароны аб’ектаў ТэрА, барацьбы з дыверсійна-выведніцкімі групамі ўмоўнага праціўніка, забеспячэння мер ваеннага становішча, у тым ліку з задзейнічаннем атрада народнага апалчэння, абароны населенага пункта”, — гаворыцца ў паведамленні.

За вучэннямі будзе назіраць начальнік Генеральнага штаба Узброеных сіл — першы намеснік міністра абароны Павел Муравейка.

Вучэнні праходзяць у рамках праверачных збораў тэрытарыяльных войскаў Пастаўскага раёна (11 сакавіка — 15 красавіка).

9 красавіка дзяржсакратар Савета бяспекі Аляксандр Вальфовіч, наведваючы раён правядзення гэтых збораў, назваў тэраабарону “адным з найважнейшых напрамкаў” у плане падвышэння абараназдольнасці Беларусі.

“Мы не робім упор, як нашы суседзі — палякі, прыбалты, на павелічэнне колькасці дзейных Узброеных сіл, што наносіць істотную шкоду эканоміцы краіны і сацыяльным пытанням насельніцтва, — заявіў ён. — Нашы Узброеныя сілы і іншыя структуры вайсковай арганізацыі дзяржавы знаходзяцца ў той колькасці, якая сёння неабходна ў мірны час, упор робіцца на падрыхтоўку”.

Паводле слоў Вальфовіча, “любыя зборавыя мерапрыемствы скіраваныя перш за ўсё на асваенне новых форм і спосабаў вядзення баявых дзеянняў; таму ў баявую падрыхтоўку Узброеных сіл і іншых войскаў і вайсковых фарміраванняў вайсковай арганізацыі дзяржавы ўкараняецца досвед сучасных ваенных канфліктаў” (гаворка, верагодна, пра вайну РФ супраць Украіны).

“У ходзе збораў па тэрытарыяльнай абароне тут, у гэтым раёне, акурат выкарыстоўваецца сучасны досвед. Гэта супрацьдронавая абарона аб’ектаў, сродкі паражэння беспілотных лятучых сродкаў, якія выкарыстоўваюцца на розных устаноўках з выкарыстаннем стралковай зброі”, — сказаў чыноўнік.

Трэці месяц запар улады правяраюць баявую гатоўнасць войска. Першая праверка боегатоўнасці была абвешчаная 3 лютага. Фактычна без дакладнага завяршэння першай пачалася другая — 24 сакавіка.

Тэрытарыяльныя войскі — род войскаў Узброеных сіл, які склікаецца ў перыяд вайны або напружанай ваенна-палітычнай абстаноўкі. Выконвае дапаможныя функцыі. Складаецца з асоб, якія прайшлі службу і знаходзяцца ў запасе.

Разам з тым міністр абароны Віктар Хрэнін на сустрэчы з кіраўніцтвам выканкамаў — Мінскага гарадскога і абласных, а таксама вайсковымі камісарамі са сталіцы і рэгіёнаў 26 траўня 2023 года ў Гомелі заявіў, што тэрытарыяльная абарона “з сістэмы, што забяспечвае, трансфармуецца ў паўнавартасную баявую”.

Рэжым Аляксандра Лукашэнкі няспынна праводзіць вучэнні, трэніроўкі, зборы на фоне абвастрэння стасункаў з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Крэмль.