Ціханоўская: Мы так і не даведаліся, што адбылося ў метро 11 красавіка 2011 года

11 красавіка, Позірк. 11 красавіка 2011 года — дзень, які адзываецца трывогай і болем у сэрцах кожнага беларуса, адзначыла дэмакратычны лідар Святлана Ціханоўская ў звароце да гадавіны тэракту на станцыі метро “Кастрычніцкая” ў Мінску.

“Мы так і не даведаліся, што насамрэч адбылося. Улады пазбавілі нас магчымасці зразумець, хто вінаваты праз закрытасць і паспешлівасць следчых дзеянняў, а сваякоў ахвяраў — шансу на справядлівае расследаванне. Рэжым, які хавае праўду, расстрэльвае людзей без празрыстага судовага працэсу і ператварае смерць у інструмент кіравання, не можа быць гарантам бяспекі для грамадзянаў. Гэта тэрарызм з боку ўлады. Менавіта жыццё з’яўляецца галоўнай і бясспрэчнай каштоўнасцю кожнага чалавека”, — падкрэсліла Ціханоўская.

Яна адзначыла, што рэжым працягвае пазбаўляць людзей самага галоўнага — жыцця, хоча, каб жах стаў руцінай, каб трагедыі выцвіталі, як старыя фатаграфіі.

За апошнія 30 гадоў каля 350 чалавек у Беларусі былр расстраляна, заявіла палітык “Раней смяротнае пакаранне здавалася чымсьці далёкім, амаль немагчымым для звычайнага чалавека. Аднак з часам рэжым Лукашэнкі моцна пашырыў тлумачэнне тэрарызму і экстрэмізму. Цяпер у спіс тэрарыстаў можна трапіць нават за крытыку ўлады, данат ці каментар у інтэрнэце. Дзяржава, па сутнасці, мае юрыдычнае права вырашаць, хто заслугоўвае жыцця, а хто — не”, — заявіла дэмлідар.

Ціханоўская лічыць, што кожны можа зрабіць нешта, каб злачынствы не заставаліся проста старонкамі ў гісторыі: падтрымаць палітвязняў, а таксама тых, хто выйшаў і працягвае змагацца; нагадваць аб праве быць пачутымі, крытыкаваць улады, якія маўчаць, калі трэба гаварыць; патрабаваць адказнасці, не згаджацца на меншае.

“Бо толькі калі мы ўсе разам пачнём гэты рух — крок за крокам, справа за справай — мы здолеем разбурыць гэты рэжым. І вярнуць у Беларусь тое, што важней за ўсё: праўду, справядлівасць і каштоўнасць жыцця чалавека”, — адзначыла палітык.

11 красавіка 2011 года ў 17 гадзін 55 хвілін на станцыі метро “Кастрычніцкая“ ў Мінску адбыўся выбух самаробнай радыёкіраванай выбуховай прылады.

Паводле афіцыйнай версіі, яна было закладзена пад лаўку насупраць прыпынку другога і трэцяга вагонаў цягнікоў, што ідуць у бок станцыі “Плошча Леніна“. Прылада была начыненая паражальнымі элементамі. У выніку тэракту на месцы загінула 11 чалавек, яшчэ чацвёра памерлі пазней, пацярпела амаль 200.

Праз некалькі гадзін на месца надзвычайнага здарэння прыбыў Аляксандр Лукашэнка з сынам Мікалаем, якому на той момант было шэсць гадоў.

Раніцай 12 красавіка КДБ адсправаздачыўся пра ідэнтыфікацыю асобы выканаўцы тэракту, яго абвясцілі ў вышук.

На наступны дзень Лукашэнка заявіў, што тэракт раскрыты, пазней яго арганізатарамі былі названыя Дзмітрый Канавалаў і Уладзіслаў Кавалёў. 30 лістапада 2011 года суд прыгаварыў абодвух да расстрэлу.

Гл. таксама па тэме:

Тэракт у мінскім метро. Праўда чакае змены рэжыму