Рыжанкоў наведвае Эфіопію

13 красавіка, Позірк. Міністр замежных спраў Беларусі Максім Рыжанкоў наведвае Эфіопію, паведамляе прэс-служба ведамства.

Перамовы пачаліся з сустрэчы з кіраўніком МЗС Гедыёнам Цімацевасам.

“У фокусе ўвагі практычныя крокі ўмацавання ўзаемавыгаднага супрацоўніцтва, рэалізацыя сумесных інавацыйных праектаў па шырокім спектры напрамкаў, гандлёва-эканамічнае ўзаемадзеянне з акцэнтам на вытворчую кааперацыю”, — гаворыцца ў рэлізе.

Міністры “падрабязна разгледзяць сусветны і рэгіянальны парадак дня, узаемадзеянне ў міжнародных арганізацыях”.

Тэрміны візіту не называюцца.

Дыпламатычныя адносіны Мінск і Адыс-Абеба ўстанавілі ў 1994 годзе. У краіне па сумяшчальніцтве акрэдытаваны амбасадар у Кеніі.

Паводле даных МЗС, узаемны тавараабарот у 2021 годзе склаў 1,3 млн. долараў. Больш актуальныя звесткі на сайце беларускага знешнепалітычнага ведамства не прадстаўлены.

Прэзідэнта краіны Тае Ацку-Селасіі Аляксандр Лукашэнка запрасіў у Беларусь, віншуючы яго ў кастрычніку мінулага года з выбраннем на пасаду.

Эфіопія з’яўляецца парламенцкай рэспублікай, прэзідэнт у сістэме дзяржкіравання выконвае пераважна прадстаўнічыя функцыі.