Чыноўнікі Беларусі і Эфіопіі абмеркавалі супрацу ў галіне ядзернай энергетыкі, нетраў, абароны
15 красавіка, Позірк. Супрацу ў галіне “мірнай атамнай энергетыкі”, навукова-даследчых праграм, высокіх тэхналогій і бізнес-інкубатараў абмеркавала беларуская дэлегацыя на чале з міністрам замежных спраў Максімам Рыжанковым 14 красавіка ў Адыс-Абебе на сустрэчы з міністрам інавацый і тэхналогій (МІТ) Эфіопіі Белетэ Молам, паведамляе прэс-служба МЗС Беларусі.
Паводле інфармацыі прэс-службы МІТ Эфіопіі, Мола выказаў удзячнасць Беларусі за “падтрымку на шматбаковых пляцоўках і за незалежную пазіцыю”, заклікаў працягнуць такую палітыку. Ён таксама падкрэсліў “вырашальную ролю супрацы з краінамі-партнёрамі” для паспяховага развіцця “інфраструктуры, чалавечых рэсурсаў, сучасных тэхналогій”, каб умацаваць канкурэнтаздольнасць Эфіопіі і палепшыць эканамічны патэнцыял.
На перагаворах з генеральным дырэктарам Эфіёпскага інвестыцыйнага холдынга Брукам Тае, як паведамляе прэс-служба МЗС Беларусі, дасягнутыя дамоўленасці пра мадэрнізацыю вытворчай базы афрыканскай краіны з выкарыстаннем беларускіх тэхналогій.
Пастаўкі беларускай тэхнікі, стварэнне сумесных прадпрыемстваў і падрыхтоўка кадраў у беларускіх ВНУ абмяркоўвалася на сустрэчы з міністрам горназдабыўной прамысловасці Хабтаму Тэгегне. Сцвярджаецца, што эфіёпскі чыноўнік папрасіў беларускі бок дапамагчы ў “засваенні радовішчаў карысных выкапняў, што маюцца ў Эфіопіі”.
На сустрэчы з дзяржаўным міністрам па развіцці сельскагаспадарчых інвестыцый і паставак рэсурсаў (у падпарадкаванні міністра сельскай гаспадаркі) Сафіяй Каса размова ішла ў асноўным пра падрыхтоўку кадраў для Эфіопіі ў чатырох беларускіх аграрных ВНУ, а таксама пра ўкараненне беларускіх тэхналогій механізацыі сельскай гаспадаркі.
Эфіопія, як сцвярджаецца, зацікаўленая ва ўсталяванні “доўгатэрміновых партнёрскіх стасункаў па пастаўках беларускіх угнаенняў”.
Візіт Рыжанкова ў Эфіопію завяршыўся сустрэчай з міністрам абароны Аішай Махамед. Бакі абмеркавалі перспектывы двухбаковага ўзаемадзеяння ў абароннай і вайскова-тэхнічнай сферах, у тым ліку абмен візітамі і рэалізацыю сумесных ініцыятыў.
Пра тое, што Рыжанкоў наведвае Эфіопію, МЗС паведаміла 13 красавіка. У той дзень міністр сустрэўся са сваім эфіёпскім калегам Гедыёнам Тыматэвасам.
Дыпламатычныя стасункі Мінск і Адыс-Абеба ўсталявалі ў 1994 годзе. У краіне па сумяшчальніцтве акрэдытаваны амбасадар у Кеніі.
Паводле даных МЗС, узаемны тавараабарот у 2021 годзе склаў 1,3 млн долараў. Больш актуальныя звесткі на сайце беларускага знешнепалітычнага ведамства не прадстаўленыя.
Прэзідэнта краіны Тае Ацке-Селасіе Аляксандр Лукашэнка запрасіў у Беларусь, віншуючы яго летась у кастрычніку з выбраннем на пасаду.
Эфіопія з’яўляецца парламенцкай рэспублікай, прэзідэнт у сістэме дзяржкіравання выконвае пераважна прадстаўнічыя функцыі.