З Беларусі дэпартаваны з забаронай на ўезд былы палітвязень з польскім грамадзянствам

16 красавіка, Позірк. Палітвязень з польскім грамадзянствам Роберт Томпала дэпартаваны з Беларусі пасля вызвалення. Яму на восем гадоў забаронены ўезд у Беларусь, паведамляе праваабарончая ініцыятыва dissidentby.

Томпала пражываў у Беларусі з 90-х гадоў, быў затрыманы ў 2023 годзе.

За каментары ў сацыяльных сетках яго асудзілі на тры гады пазбаўлення волі паводле ч. 1 арт. 368 (абраза прэзідэнта) і арт. 369 (абраза прадстаўнікоў улады) КК. Тэрмін Томпала адбываў у наваполацкай калоніі № 1 (Віцебская вобласць).

14 ліпеня 2023 года яго імя было ўнесена ў спіс “асоб, якія маюць дачыненне да экстрэмісцкай дзейнасці“. Тады ж паведамлялася, што Томпала з’яўляецца сузаснавальнікам кампаніі, якая пастаўляе кандытарскія вырабы.

8 жніўня таго ж года праваабаронцы прызналі паляка палітвязнем.

Як адзначае dissidentby, дэпартацыя адбылася адразу пасля вызвалення — Томпала павінен быў дабірацца да Польшчы самастойна. Вядома, што ў яго ёсць непаўналетняе дзіця. Верагодна, сям’я засталася ў Беларусі.

Паводле інфармацыі праваабарончага цэнтра “Вясна”, у Беларусі па стане на сакавік у зняволенні знаходзілася 36 замежных грамадзян.