Дзясяткі гектараў лесу пацярпела ў Гомельскай вобласці ад пераходу агню з тэрыторыі Украіны — Мінлясгас

20 красавіка, Позірк. Дзясяткі гектараў лесу пацярпела ў Мілошавіцкім лясгасе (Лельчыцкі раён Гомельскай вобласці) у выніку пераходу агню з тэрыторыі Украіны, паведаміла 20 красавіка Міністэрства лясной гаспадаркі.

Пажар ліквідаваны сіламі 20 адзінак тэхнікі і 70 чалавек. Прыцягваліся Лельчыцкі, Ельскі, Калінкавіцкі, Мазырскі вопытны лясгасы і Нараўлянскі спецлясгас, Лельчыцкі раённы аддзел па надзвычайных сітуацыях.

Дакладная плошча ачага ўдакладняецца.

У паведамленні гаворыцца, што 19 красавіка ліквідавана 16 лясных пажараў, якія былі зафіксаваныя ва ўсіх абласцях краіны. Агульная плошча ачагоў перавысіла 35 га.

З пачатку года ў лясным фондзе Мінлясгаса здарылася 326 лясных пажараў на плошчы звыш 450 га. “Шэраг узгаранняў удалося прадухіліць, з прычыны таго, што работнікі лясной гаспадаркі таксама бралі на сябе тушэнне сельгаспалаў, спыняючы агонь на шляху да лесу”, — падкрэслівае ведамства.