Амбасадар Беларусі і прэзідэнт Ізраіля абмеркавалі традыцыі ўзаемнай павагі беларускага і яўрэйскага народаў

21 красавіка, Позірк. “Шматгадоваму дыялогу культур”, а таксама “традыцыям узаемнай павагі і ўзаемаразумення, у духу якіх жылі і працягваюць жыць” беларускі і яўрэйскі народы, надалі “асобную ўвагу” падчас размовы амбасадар Беларусі Юрый Ярашэвіч і прэзідэнт Ізраіля Іцхак Герцаг, паведамляе прэс-служба знешнепалітычнага ведамства.

Паводле інфармацыі МЗС, сустрэча адбылася 21 красавіка пасля цырымоніі, на якой беларускі дыпламат уручыў ізраільскаму палітыку даверчыя граматы.

Ярашэвіч, як сцвярджаецца, “падкрэсліў глыбіню гістарычных і духоўных сувязей паміж Беларуссю і Ізраілем” і нагадаў суразмоўцу пра “беларускае паходжанне шэрагу выдатных дзеячаў яўрэйскай гісторыі і Дзяржавы Ізраіль”.

Сярод іншага бакі “абмяняліся думкамі пра актуальны стан і перспектывы развіцця палітычнага дыялогу, пашырэння гандлёва-эканамічных сувязей і паглыблення гуманітарнай супрацы”.

“Узаемаразуменне” паміж беларускім і яўрэйскім народамі, пра якое заяўляе МЗС, перыядычна азмрочваецца антысеміцкімі выказваннямі Аляксандра Лукашэнкі.

Напрыклад, 14 чэрвеня 2024 года ён адзначыўся такімі, кажучы пра карупцыйную справу, адным з фігурантаў якой з’яўляецца яго былы памочнік — інспектар па Віцебскай вобласці, экс-міністр сельскай гаспадаркі і харчавання Ігар Брыло.

“Пра Брыло шмат чулі, — заявіў ён (фрагмент выступу быў паказаны ў вечаровым эфіры тэлеканала “Беларусь 1”, прэс-служба тэкставую расшыфроўку адпаведнага моманту не апублікавала). — Не буду нагадваць і паўтараць. Прыцягнутыя на сёння тры дзесяткі чалавек”.

“Вы мяне прабачце, я не антысеміт, але больш за палову — яўрэі, — дадаў Лукашэнка. — Яны што ў нас прывілеяванае становішча займаюць, што яны крадуць і не думаюць пра сваю будучыню? Усе аднолькавыя перад законам — і яўрэй, і беларус, і ўкраінец, і рускі, і паляк. Вінаваты — будзе сядзець”.

Праз два дні Ісраэль Кац, які тады займаў пасаду міністра замежных спраў Ізраіля, заявіў, што выказванні Лукашэнкі “непрымальныя і абуральныя”, “гучаць як відавочна антысеміцкія”.

Пазней стала вядома, што праз іх была скасаваная прызначаная ў Ізраілі канферэнцыя, прысвечаная 80-годдзю вызвалення Беларусі ад нямецка-фашысцкіх захопнікаў.

У 2007 годзе Лукашэнка пахваліўся перад расійскімі журналістамі абноўленым Бабруйскам (Магілёўская вобласць). “Калі вы былі ў Бабруйску, вы бачылі, у якім стане горад. У яго страшна было зайсці! Свінушнік быў! Гэта ў асноўным быў яўрэйскі горад. Ну, вы ведаеце, як яўрэі ставяцца да месца, дзе яны жывуць. Паглядзіце ў Ізраілі”, — сказаў ён.

На гэты слоўны выпад прыйшлося рэагаваць тагачаснаму ізраільскаму віцэ-прэм’еру — міністру замежных спраў Цыпі Ліўні, якая “рашуча асудзіла” гэтыя “адкрыта антысеміцкія выказванні”. Чыноўніца падкрэсліла, што лідары абавязаныя “змагацца з антысемітызмам усюды, дзе гэтая з’ява паднімае сваю пачварную галаву, па ўсім свеце, а не заахвочваць яе”.

Перад нацыяналізацыяй кандытарскіх фабрык “Камунарка” і “Спартак” у 2012 годзе Лукашэнка выказаўся пра бізнесмена Марата Новікава: “Былы бухгалтар Ізя Сігізмундавіч (ці як яго там), змяніўшы прозвішча на Новікаў, з’ехаў у Амерыку і ўсталяваў кантроль над беларускімі прадпрыемствамі, набыўшы за бутэльку гарэлкі акцыі кандытарскіх фабрык”.

У 2015 годзе ў поле яго зроку трапіў заснавальнік партала tut.by Юрый Зісер, цяпер нябожчык. Звяртаючыся да Сямёна Шапіры, які тады ўзначальваў Мінаблвыканкам, Лукашэнка заявіў: “Неяк Зісер гэты ваш непрыстойна сябе паводзіць часам”.

“Я вас прасіў год таму ўзяць усіх яўрэяў пад кантроль у Беларусі. І нават Павел Ізотавіч (Якубовіч, на той момант галоўны рэдактар ​​дзяржаўнай газеты “Советская Белоруссия”, якая з 2018 года называецца “СБ. Беларусь сёння”. — “Позiрк”.) не абураўся. Зісер ніяк не можа. Ніяк ты не можаш нармалізаваць гэтага чалавека?” — сказаў ён.

Напрыканцы 2023 года Лукашэнка, разважаючы перад журналістамі ў Санкт-Пецярбургу пра магчымасць выхаду Арменіі з аб’яднанняў на постсавецкай прасторы, заявіў: “Не думаю, што армяне дурныя людзі. Армяне ж разумныя людзі! Там жа няма ніводнага яўрэя!”