Лукашэнка паабяцаў падтрымку Гутэрышу — генсакратару ААН, якую называў “падручным сабачкам” Захаду
30 красавіка, Позірк. Дзякуючы ўменню Антоніу Гутэрыша “арганізаваць працэс перагавораў, аб’яднаць вакол сябе аднадумцаў і неабыякавых людзей” сталі магчымыя многія дасягненні Арганізацыі Аб’яднаных Нацый “у цяперашніх складаных умовах”, такое меркаванне выказаў 30 красавіка Аляксандр Лукашэнка, віншуючы генеральнага сакратара ААН з 75-годдзем.
“Адметнай рысай сакратарыята ААН пад вашым кіраўніцтвам з’яўляецца бесперапынны пошук аптымальных рашэнняў па шэрагу вострых праблем сучаснасці”, — прыводзіць тэкст паслання прэс-служба віншавальніка.
Беларусь, падкрэсліў Лукашэнка, “высока цэніць асабісты ўнёсак” Гутэрыша ў гэтую працу і “пацвярджае гатоўнасць развіваць міжнародную супрацу з захаваннем прынцыпаў суверэнітэту і неўмяшання ва ўнутраныя справы кожнай дзяржавы”.
“Мінск будзе паслядоўна падтрымліваць вашыя намаганні і ініцыятывы, скіраваныя на ўрэгуляванне і прадухіленне канфліктаў, паглыбленне ўзаемадзеяння паміж краінамі — членамі ААН у справе пераадолення глабальных выклікаў і пагроз”, — адзначыў ён.
Лукашэнка заявіў, што будзе “рады вітаць” генсакратара ААН “на гасціннай беларускай зямлі”.
Варта адзначыць, што на сустрэчы з удзельнікамі пасяджэння савета Парламенцкай асамблеі АДКБ 18 траўня 2023 года Лукашэнка заявіў, што ААН і АБСЕ намаганнямі “заходніх апанентаў” ператвараюцца “ў інстытуты ціску і канфрантацыі, становяцца падручнымі сабачкамі для заходніх дзяржаў”. “Мы лічым недальнабачнымі і безадказнымі такія дзеянні”, — сказаў ён.
15 чэрвеня таго ж года, прымаючы даверчыя граматы шэрагу замежных амбасадараў, Лукашэнка заявіў, што ААН “з цывілізаванай дыялогавай пляцоўкі для вырашэння спрэчак і дыскусій пра будучае развіццё свету” ператварылася ў “дыпламатычнае казіно, дзе запраўляюць заходнія верхаводы”.
На яго думку, “калектыўны Захад” толькі “пакуль запраўляе ў ААН”. “Мы выступаем за шматпалярны, справядлівы свет з гарантыямі развіцця для ўсіх краін без выключэння. У гэты час Захад разбурае сістэму еўрапейскай бяспекі, створаную пасля Другой сусветнай вайны”, — адзначыў Лукашэнка.
4 ліпеня 2024 года ў Астане (Казахстан) на палях саміту ШАС падчас сустрэчы з Лукашэнкам Гутэрыш выказаў занепакоенасць сітуацыяй з правамі чалавека ў Беларусі. Ён выказаў пажаданне, каб амністыя, у выніку якой былі вызваленыя некаторыя палітвязні, стала “крокам да поўнай павагі правоў чалавека і асноўных свабод у Беларусі” (хваля памілаванняў палітвязняў завяршылася ў канцы студзеня 2025 года, перад мерапрыемствам, якое афіцыйны Мінск лічыць “прэзідэнцкімі выбарамі”).
У кастрычніку 2024 года Гутэрыш узяў удзел у саміце БРІКС у расійскай Казані, за што пасля падпаў пад крытыку шэрагу заходніх лідараў. На палях форуму генеральны сакратар ААН правёў шмат сустрэч, у тым ліку з Лукашэнкам. Беларускі палітык, які падтрымлівае расійскую агрэсію супраць Украіны, падарыў Гутэрышу скульптуру буслоў, паведаміўшы, што гэта сімвал міру: “Нам, Антонію, вельмі патрэбен мір”.
“Вы павінны ведаць, што мы заўсёды будзем побач з вамі, што тычыцца [пытанняў] міру і вайны. Мы за мір, за мірныя перамовы, за мірнае вырашэнне любых канфліктаў”, — адзначыў Лукашэнка. Ён прайшоў у абдымку з Гутэрышам некалькі метраў.
У той жа дзень Лукашэнка даў інтэрв’ю расійскай газеце “Известия”, у якім раскрытыкаваў дзейнасць ААН, заявіўшы, што быў бы не супраць з’яўлення ў свеце арганізацыі-супрацьвагі, каб “ААН заварушылася”. Ён выступіў за тое, каб праца ААН “была эфектыўнай, каб Савет Бяспекі вырашаў пытанне, а не проста збіраўся там”, каб пытанні вайны і міру вырашаліся выключна на пляцоўцы арганізацыі.
28 лютага 2025 года міністр замежных спраў Максім Рыжанкоў на сустрэчы з пастаянным каардынатарам ААН у Беларусі Расулам Багіравым і кіраўнікамі акрэдытаваных у краіне агенцтваў арганізацыі сярод іншага заявіў пра неабходнасць “адрадзіць дух арганізацыі” ва ўмовах “узрослага канфліктнага патэнцыялу і глабальнай палярызацыі, якая ўзрастае”.
Гутэрыш раней заяўляў пра неабходнасць зняць санкцыі з экспарту беларускіх і расійскіх угнаенняў. Паводле яго слоў, на сустрэчах з расійскім і ўкраінскім лідарамі ён узнімаў пытанне харчовага крызісу, які з прычыны вайны ва Украіне ўзнік у Сенегале, Нігеры і Нігерыі.
Дэмакратычныя сілы Беларусі супраць падобных рашэнняў.