У Воранаўскім раёне на мяжы з Літвой гарыць лес, да тушэння прыцягнулі авіяцыю МНС

30 красавіка, Позірк. Пра буйны лясны пажар непадалёк ад вёскі Тоўцішкі (Воранаўскі раён Гродзенскай вобласці) на мяжы з Літвой паведаміла ўвечары 30 красавіка прэс-служба Міністэрства па надзвычайных сітуацыях.

Паводле інфармацыі ведамства, на 19:30 агнём было ахоплена 60 гектараў лесу. На месцы працавалі 23 супрацоўнікі МНС, было задзейнічана 11 адзінак тэхнікі: міністэрства — 6, Лідскага лясгаса — 5. Акрамя таго, да тушэння прыцягнулі авіяцыю МНС.

Адзначалася, што ліквідацыя пажару “ўскладненая адсутнасцю пад’язных шляхоў, парывамі ветру і блізкім заляганнем торфу”.

Праз паўтары гадзіны прэс-служба ведамства паведаміла, што тушэнне працягваецца. На 21:00 верталёт Мі-8 скінуў на пажар 24 тоны вады ў восем заходаў.