Палітвязні Пухальскі, Ліхалат і Бародзіч прыгавораныя да 25, 20 і 11 гадоў пазбаўлення волі

2 траўня, Позірк. Вярхоўны суд адхіліў апеляцыйныя скаргі на прыгаворы Барыса Пухальскага і Івана Бародзіча, асуджаных адпаведна на 25 і 11 гадоў пазбаўлення волі, паведамляе прэс-служба Генеральнай пракуратуры.

З рэлізу нагляднага ведамства вынікае, што па адной з імі справе праходзіў грамадзянін Украіны Іван Ліхалат, ён прыгавораны да 20 гадоў зняволення.

Сцвярджаецца, што “абвінавачаныя на працягу 2023 года ў рамках злачыннага ўзаемадзеяння з прадстаўнікамі ўкраінскіх спецыяльных службаў збіралі і прадастаўлялі ім звесткі, а таксама выконвалі іншыя заданні, якія маглі нанесці шкоду нацыянальнай бяспецы Рэспублікі Беларусь”.

Пухальскі і Ліхалат, як заяўляецца, здзейснілі спробу падрыву на ўчастку чыгункі ў Талачынскім раёне (Віцебская вобласць). “Названыя дзеянні кваліфікаваныя як замах на акт тэрарызму паводле ч. 1 арт. 14, ч. 3 арт. 289 Крымінальнага кодэкса і замах на прывядзенне ў непрыдатнасць сродкаў чыгуначнага транспарту паводле ч. 1 арт. 14, ч. 4 арт. 309 КК”, — гаворыцца ў паведамленні.

У верасні 2023 года Пухальскі, Ліхалат і Бародзіч унесеныя ў спіс “тэрарыстаў”.

19 снежня 2024 года мужчыны былі прызнаныя праваабаронцамі палітычнымі зняволенымі.

Паводле інфармацыі праваабарончага цэнтра “Вясна” на 15 студзеня 2025 года, з сярэдзіны 2020-га за “наўмыснае прывядзенне ў непрыдатнасць транспартнага сродку або шляхоў зносін” (арт. 309 КК) або замах на гэта было асуджана не менш за 34 чалавекі, 19 з якіх знаходзілася на той момант у зняволенні.

Дыверсіі на беларускай чыгунцы пачасціліся пасля ўварвання Расіі ва Украіну 24 лютага 2022 года з тэрыторыі Беларусі і з выкарыстаннем яе інфраструктуры. Адразу ў некалькіх месцах краіны былі пашкоджаныя рэлейныя шафы — абсталяванне, якое аўтаматызуе рух цягнікоў. Некаторых “рэйкавых партызан” затрымлівалі брутальна — з ужываннем агнястрэльнай зброі. Многія пасля былі пазбаўленыя волі на працяглыя тэрміны.