З Беларусі дэпартаваны грамадзянін Шры-Ланкі, які знаходзіўся ў міжнародным вышуку за саўдзел у забойстве (абноўлена)

4 траўня, Позірк. З Беларусі дэпартаваны грамадзянін Шры-Ланкі, які знаходзіўся ў міжнародным вышуку, паведаміла прэс-служба МУС 4 траўня.

“Супрацоўнікі органаў унутраных спраў Беларусі ў рамках міжнароднага ўзаемадзеяння ў чарговы раз паспяхова адпрацавалі інфармацыю, якая паступіла па каналах Інтэрпола, аб верагодным знаходжанні на тэрыторыі нашай дзяржавы іншаземца, які адшукваецца за ўчыненне шэрагу цяжкіх злачынстваў”, — гаворыцца ў рэлізе.

36-гадовы ланкіец быў затрыманы ў Мінску. Ён знаходзіўся ў міжнародным вышуку за саўдзел у забойстве двух чалавек на тэрыторыі Шры-Ланкі, прычыненне цяжкіх цялесных пашкоджанняў чатыром асобам з выкарыстаннем агнястрэльнай зброі, а таксама незаконнае захоўванне агнястрэльнай зброі і боепрыпасаў.

“Прынята рашэнне аб дэпартацыі шуканага ў Дэмакратычную Сацыялістычную Рэспубліку Шры-Ланка. Працэдура перадачы адбылася ў Нацыянальным аэрапорце “Мінск”, — паведаміла ведамства.

Верагодна, гаворка ідзе аб Суджыве Руванкумары, вядомым як “Локу Паці” — галоўным падазраваным у арганізацыі і фінансаванні расстрэлу людзей на адкрыцці тату-салона ў Атуругірыі (Шры-Ланка) у ліпені мінулага года.

Пра яго затрыманне ў Беларусі 1 жніўня паведамлялі мясцовыя СМІ са спасылкай на інфармацыю ланкійскай паліцыі. Фігурант быў названы “арганізаваным злачынцам і буйным наркагандляром”.

Абнаўленне.

Паліцыя Шры-Ланкі пацвердзіла, што дэпартаваны — Суджыва Руванкумара.

Паводле інфармацыі Adaderana.lk, яго даставілі ў краіну на борце прыватнай авіякампаніі з Дубая раніцай 4 траўня.

Паводле прадстаўніка мясцовай паліцыі Будыкі Манатунгі, затрыманы датычны да некалькіх забойстваў, захоўвання наркотыкаў і агнястрэльнай зброі.