Ад пачатку года краіны ЕС спынілі больш за 10 тыс. спробаў мігрантаў незаконна перасекчы мяжу з боку Беларусі

Апублікавана на адкрытай версіі “Позірку” 11 траўня 2025 года ў 11:03

10 траўня, Позірк. З 1 студзеня па 9 траўня 2025 года суседнія краіны Еўрасаюза прадухілілі не менш як 10.210 спробаў мігрантаў нелегальна трапіць з тэрыторыі Беларусі, сведчыць праведзены “Позіркам” аналіз даных памежных службаў гэтых дзяржаў.

Польшча спыніла сама меней 6.741 (без уліку 9 траўня, даныя за які з’явяцца пасля выходных), ці 66,02% зафіксаваных выпадкаў. Ад пачатку траўня спынена 852 спробы. Дэталёвы аналіз абцяжараны ў сувязі з тым, што Памежная ахова Польшчы ў апошнія месяцы публікуе прыблізныя лічбы, якія разыходзяцца з данымі іншых краін ЕС — суседзяў Беларусі.

Латвія прадухіліла сама меней 2.768 спробаў нелегальнага перасячэння мяжы з боку Беларусі (27,11% зафіксаваных выпадкаў; ад пачатку траўня — 777), Літва — 701 (6,87%; 137).

Калі прыняць да ўвагі вядомую колькасць спробаў, то актыўнасць мігрантаў на мяжы Беларусі і ЕС у цэлым у гадавым вымярэнні знізілася на 23,62% (1 студзеня — 9 траўня 2024 года было 13.367). На мяжы з Польшчай яна зменшылася на 41,32% (11.487); Латвіяй — павялічылася на 63,59% (1.692), Літвой — вырасла ў 3,7 раза (188).

У 2024 годзе гэтыя краіны спынілі ў агульнай складанасці 36.291 спробу незаконнага перасячэння мяжы з беларускай тэрыторыі, у тым ліку Польшча — 29.972, Латвія — 5.317, Літва — 1.002.

Міграцыйны крызіс на мяжы Беларусі і краін Еўрасаюза цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца ў Еўрасаюз праз Беларусь, бо што іх туды “паклікалі”.