Кубракоў паскардзіўся кіраўніку Інтэрпола, што падтрымка Мінска з боку арганізацыі “шэрагам краін тармозіцца”

13 траўня, Позірк. Стасункі з Інтэрполам “выключна важныя для Міністэрства ўнутраных спраў Беларусі”, — заявіў кіраўнік ведамства Іван Кубракоў на сустрэчы з прэзідэнтам арганізацыі Ахмедам Насерам аль-Раісі падчас Сусветнага паліцэйскага саміту ў Дубаі 13 траўня.

“МУС Беларусі, як адказны і актыўны члена арганізацыі, адкрыты да ўсіх тэм і ідэй, што спрыяюць нашаму сумеснаму развіццю, — цытуе Кубракова прэс-служба МУС. — Гатовыя актыўна працаваць над новымі праектамі і ініцыятывамі. Упэўненыя, што наша супрацоўніцтва можа дасягнуць новых вышынь, калі будзем працягваць абменьвацца вопытам і знаходзіць кропкі судакранання. Давайце разам будаваць будучыню, поўную поспехаў і магчымасцяў”.

Кубракоў падзякаваў прэзідэнту Інтэрпола “за падтрымку Беларусі і ў цэлым за развіццё паліцэйскай супольнасці”, нягледзячы на тое, што “шэрагам краін гэты працэс тармозіцца”.

Акцэнт у размове быў зроблены на працы па супрацьдзеянні нарказлачынствам і пошуку асоб, што знаходзяцца ў міжнародным вышуку, адзначае МУС.

Адзначыўшы актыўнае ўзаемадзеянне з Міжнароднай арганізацыяй крымінальнай паліцыі, міністр падкрэсліў поспехі ў аператыўным супрацоўніцтве па барацьбе з цяжкімі злачынствамі, у тым ліку тэрарызмам, наркатрафікам і кіберзлачыннасцю.

Паводле міністра, Мінск гатовы падтрымліваць міжнародныя ініцыятывы ў барацьбе са злачыннасцю і распрацоўваць сумесныя праекты з іншымі дзяржавамі, а таксама працягваць актыўнае супрацоўніцтва і абмен досведам дзеля забеспячэння бяспекі як на нацыянальным, так і на міжнародным узроўні.

У сваю чаргу кіраўнік Інтэрпола адзначыў, што ў яго “вельмі добрыя сувязі з Беларуссю, кожны візіт у якую пакідае незабыўныя ўражанні”: “Асабліва каштоўна, што вашы супрацоўнікі, нават нягледзячы на пэўныя палітычныя моманты, нязменна працягваюць працу ў нашым накірунку”.

У Інтэрпол уваходзяць амаль усе краіны свету, акрамя Паўночнай Карэі, Туркменістана, Таджыкістана, Бутана, Кірыбаці, Мікранезіі, Палаў, Самоа, Сан-Марына, Саламонавых астравоў, Тувалу, Вануату і Ватыкана.

Нацыянальнае бюро Інтэрпола ў Беларусі з’яўляецца структурным падраздзяленнем МУС.

Беларускія ўлады спрабавалі выкарыстаць міжнародную паліцыю для затрымання беларускага дэмакратычнага лідара Святланы Ціханоўскай, аднак у Інтэрполе палічылі немагчымым выкарыстоўваць свае каналы для міжнароднага вышуку былога кандыдата на пасаду прэзідэнта.

Пры гэтым Мінск працягвае спробы экстрадыцыі з-за мяжы асобаў, якіх пераследуюць на радзіме па палітычных матывах, праз Інтэрпол.