Брухан сышоў з пасады ў АПК з прычыны абрання спікерам КР (дапоўнена)

дададзеныя абзацы 5–6

15 траўня, Позірк. Арцём Брухан сышоў з пасады намесніка прадстаўніка Аб’яднанага пераходнага кабінета (АПК) па транзіце ўлады ў сувязі з абраннем спікерам Каардынацыйнай рады (КР), паведаміла 15 траўня прэс-служба АПК.

Адстаўку палітыка прыняў яго цяпер ужо былы непасрэдны начальнік — намеснік кіраўніцы АПК і прадстаўнік па транзіце ўлады Павел Латушка.

Паводле інфармацыі кабінета, Брухан на сваёй пасадзе “распрацаваў канцэпцыю транзітнага перыяду, падыходы да “круглага стала” ў транзітны перыяд змены ўлады ў Беларусі, рыхтаваў прапановы да стратэгіі дзеянняў кабінета”. Ён таксама займаўся “лабіяваннем адказнасці прадстаўнікоў рэжыму за незаконнае перамяшчэнне ўкраінскіх дзяцей у Беларусь, ажыццяўляў па гэтым пытанні кантакты з украінскім бокам, рыхтаваў пазіцыю і праекты заяў кабінета па ўнутранай сітуацыі ў Беларусі”.

Брухан адказваў за “падрыхтоўку пратакола ўзаемадзеяння дэмакратычных сіл, прадстаўляў кабінет у аргкамітэтах па правядзенні мерапрыемстваў дэмсіл — канферэнцый “Новая Беларусь”, Кангрэса дыяспар, арганізацыі выбараў у Каардынацыйную раду”.

Латушка, віншуючы Брухана з абраннем, адзначыў, што КР — гэта “першы за апошнія дзесяцігоддзі рэальна абраны беларусамі прадстаўнічы орган”. На яго думку, гэта “найважнейшы дэмакратычны інстытут, які мае легітымнасць праз выбары”. Гэтая палітычная структура, адзначыў Латушка, з’яўляецца “інстытутам у дэмакратычным руху краіны і рыхтуе арганізацыйна і палітычна дэмакратычныя змены ў Беларусі”.

“Перакананы, што Арцём Брухан будзе годна прадстаўляць Каардынацыйную раду і забяспечыць максімальна канструктыўнае ўзаемадзеянне ўсіх фракцый і членаў рады, а таксама будзе садзейнічаць прыняццю важных рашэнняў, што скіраваныя для дасягнення нашай агульнай мэты — незалежнай, свабоднай і дэмакратычнай Беларусі”, — цытуе палітыка тэлеграм-канал фракцыі “Каманда Латушкі і Рух “За Свабоду” ў КР.

34-гадовы Арцём Брухан быў абраны спікерам КР 14 траўня, значна апярэдзіўшы паводле колькасці набраных галасоў свайго адзінага апанента — 51-гадовага экс-бізнесмена, прадстаўніка фракцыі “Беларусы” Аляксандра Кныровіча.

Варта адзначыць, што Брухан з’яўляецца членам фракцыі “Каманда Латушкі і Рух “За Свабоду” ў КР, а таксама супрацоўнікам Народнага антыкрызіснага ўпраўлення, якое ўзначальвае Латушка. У Беларусі працаваў у Брэсцкім аблвыканкаме.

Папярэдні спікер КР Анжаліка Мельнікава, пра знікненне якой стала вядома напрыканцы сакавіка, таксама ўваходзіла ў фракцыю, якую ўзначальвае Латушка.