Польская мытня спыніла спробу ўвозу ў Беларусь 5 тон шын для Boeing

19 траўня, Позірк. Польская мытня канфіскавала 5 тон шын для грамадзянскіх самалётаў Boeing, якія рухаліся транзітам праз Беларусь і Расію, паведамляе Reuters.

Адзначаецца, што такія пастаўкі забароненыя санкцыямі Еўрапейскага саюза.

Паведамляецца, што шыны былі выяўленыя падчас праверкі грузавіка ў прапускным пункце ў Карошчыне (з беларускага боку — Казловічы). У дакументах было пазначана, што гэта покрыўкі для легкавых аўтамабіляў і аўтобусаў.

Адпраўніком тавару была кампанія з Іспаніі, атрымальнікам — з Азербайджана.

Узбуджана крымінальная справа.

2 сакавіка 2022 года, неўзабаве пасля поўнамаштабнага ўварвання Расіі ва Украіну, ЗША ўвялі ў дачыненні да перавозчыка “Белавія” абмежаванні, якія тычацца экспарту прадукцыі авіяцыйнай сферы і ліцэнзавання пэўных самалётаў і запчастак. 7 снежня 2023 года яны былі падоўжаныя яшчэ на 180 дзён.

9 жніўня 2023 года “Белавія” трапіла ў санкцыйны спіс ЗША.

3 лістапада 2023 года генеральны дырэктар авіякампаніі Ігар Чаргінец прызнаў, што планы па мадэрнізацыі флоту самалётаў авіякампаніі “Белавія” былі парушаныя з-за ўвядзення заходніх санкцый.

У лютым 2022-га Еўрасаюз увёў санкцыі супраць РФ, якія прадугледжваюць забарону на продаж самалётаў, запчастак і абсталявання расійскім авіякампаніям. На гэтым фоне найбуйнейшыя авіявытворцы — Airbus і Boeing — адмовіліся ад паставак самалётаў у Расію. Boeing таксама прыпыніў пастаўкі запчастак, тэхнічнае абслугоўванне і тэхнічную падтрымку расійскіх авіякампаній.